Serge Mansur

Historia y Motivo di Existencia di Gobernacion (En Breve)

Den comienzo, hende no tabatin e necesidad di un gobierno como cu tabatin asina poco hende na mundo. Mayoria hende tabata biba cu nan propio famia of den gruponan chikito. Esnan di mas edad tabata dicidi kico pa hasi sin un of otro sistema especifico.

Esnan cu no tabata di acuerdo cu e forma cu cos tabata cana tabatin e libertad di sali for di e grupo y bai riba su mes of hunta su mes na un otro grupo. Durante e periodo di piedra (stone age) tur hende tabata biba asina.

Na final di e asina yamá “Stone Age”, door di aumento di e poblacion varios di e gruponan tabata birando hopi mas grandi locual a hasi mas dificil pa tuma decision. E ora ey a bira necesario pa yega na un sistema pa tuma decision. Esaki tabata e nacemento di gobierno.

Cu tempo e famianan a crea tribu, e tribunan tabata uni, y e gruponan di hende cu tabata identifica cu otro a bira mas grandi. Esaki a causa cu a cuminsa crea pueblo, y hasta ciudad, locual a crea otro necesidadnan Ya caba no tabata suficiente pa tini un Gobierno pa tuma decision so, pero e Gobierno a bira necesario pa hasi e tareanan cu e hendenan individualmente no por a hasi. Esaki ta inclui proyectonan grandi manera traha un muraya di proteccion rond di e pueblo, traha caminda, crea regla (ley), proteha e ciudadania, etc.

Naturalmente pa por logra e tareanan aki tabatin mester di fondo. Historicamente e fondonan aki tabata wordo genera door di cobra impuesto riba e comerciantenan cu ta pasa den e teritorio di e grupo en cuestion. E comerciantenan aki tabata incorpora e costo di e impuesto den nan prijs ora di bende of cambia nan mercancia.

Ta importante pa realiza cu e estado natural di humanidad ta uno di independencia y di propiedad y iniciativa priva. E propio existencia di “gobernacion” ta unicamente pasobra tin algun cos cu nos no por hasi riba nos mes. E realidad aki ta uno cu mester keda semper den nos pensamento ora cu nos considera kico ta e tareanan y responsabilidad di un gobierno.

Cu e crecemento di poblacion y e crecemento di e importancia di e “Gobierno”, naturalmente e poder di esnan encarga cu e Gobierno tambe a aumenta. Esaki a causa un cambio masha importante cu ta existi te awe. Caminda cu den comienzo e lidernan tabata hendenan cu un sentido di responsabilidad pa cu nan famia of nan tribo, cu tempo mas y mas hendenan cu interesnan aheno a drenta den e arena politico cu e intencion di beneficia nan mes of nan “grupo” (famia, amigo, socio, etc). E desaroyo aki a crea e incentivo pa e personanan aki pa engrandece e responsabilidad di gobierno pa asina por acumula mas poder y mas beneficio.

Over di tempo Gobiernonan a cuminsa asumi mas y mas tarea. Algun di nan cu bon hustificacion, pero mucho hopi di nan pa motivo di mala fe of pa motivo di ignorancia. E propio motivo di existencia di Gobierno a wordo lubida, esta hasi pa e comunidad e locual individualmente nos no por hasi.

Atravez di e añanan a perde for di bista cu e Gobierno a wordo trecí den existencia cu un solo meta: Sirbi e comunidad for di cual ela nace. Na su lugar e mentalidad a nace (y a crece) cu e comunidad t’ey pa sirbi e Gobierno, y pa contribui cada dia mas pa por sostene un aparato Gubernamental cada dia mas grandi y cu mas y mas ta mete den asuntonan cu no ta su tarea.

Mi ta sinti cu un di e tareanan di nos partido ta pa trece e situacion bek den un balance saludabel. Na Aruba nos tin un situacion cu ta completamente for di balance. Nos a yega na un punto cu e aparato Gubernamental a crece te bira un monster cu ta hanja su mes obliga di virtualmente plunder e comunidad cu e mester sirbi pa asina e por tene su mes na bida y favorece esnan mas yegá na e gobernantenan.

Esey no por sigui asina. Nos mester yega bek na e motivo di existencia di nos Gobierno:

SIRBI E COMUNIDAD ARUBANO.