Serge Mansur

Partido Democracia Real ta considera e periodo di campanja como un oportunidad pa comunica nos ideanan y plannan cu e pueblo votador. Esaki ta hasi cu nos ta kere cu mester tuma e oportunidad ey na serio, y us’e pa splica e pueblo votador kico nos intencionnan ta pa cu e maneha di nos pais.

Den esaki tin biaha ta necesario pa critica e maneho existente pa asina por splica pakico tin mester di un cambio y pakico e maneho existente ta perhudicial pa nos pais. Pero e critica aki mester keda un critica riba e forma di goberna, y e decisionnan cu ta wordo tumá. E no mag deteriora y bira ataquenan personal riba gobernante.

Mi persona, mescos cu demas integrantenan di nos partido lo sa di enfoca riba hechonan. Nos lo no participa den e tacticanan di e partidonan tradicional cu ta gusta desvia atencion di e temanan importante pa nos pais, y bin cu ataquenan personal cu no ta al caso.

Pa nos partido ta importante pa core un campanja di nivel, y tambe di ta realistico y responsabel den loke nos ta trece dilanti. Nos ta considera cu loke nos trece dilanti durante campanja ta keda valido despues di eleccion tambe.