Nos sa cu tin problema den gobierno di Aruba. Durante e ultimo anjanan nos sa cu dos minister a sera porta pa CAD, y ta net nan ministerionan a wordo confronta cu un serie di escandalo durante  eultimo añanan. Pesey nos ta considera cu ta importantisimo y sigur beneficioso pa esnan responsabel di nos gobierno hanja sa si acaso tin un of mas problema di cual kizas nan no ta altanto.

Na un nivel un tiki mas halto tambe ta importante pa nos prome minister hanja sa si acaso tin un of mas ministro cu a participa den actividanan incorecto cu lo por a perhudica nos pais y nos comunidad. E gabinete aki ta carga nomber di Sr. Oduber, y como esun responsabel pa e gobierno aki, e mester sa si tin un problema pa asina e por atende cun’e y hasi su trabou como debe ser.

Pesey Democracia Real ta considera e investigacion anuncia pa Sra. Bijleveld como un oportunidad positivo pa e Gobierno aki mustra cu nan ta cumpliendo cu nan deber na nos pais. Un oportunidad cu nan mester tuma cu man habri.

Pa nos partido ta realmente preocupante pa nota con Sr. Oduber, su Gobierno, su parlamentarionan y henter su partido a asumi un postura defensivo y histerico y a drenta den un panico completo. Mescos cu den pasado nan ta culpa tur instancia, pais, organizacion, persona, mata, flor, animal, etc. di ta involvi den un complot encontra di nan. Nan ta pretende tambe cu e investigacion ta sin base.

Naturalmente esey ta ridiculo!

E gobierno aki su mal gobernacion y su falta completo di coherencia y capacidad ta e unico causa di e investigacion cu ta bai wordo hasi aki na Aruba.

Ya caba 5 anja pasa mi a adverti e Gobierno cu nan maneho sub-mediocre tabata pone nos autonomia na peliger. Awe esaki ta birando realidad pasobra e Gobierno aki ta nenga di scucha di esnan cu pa cualkier motivo nan no gusta. Esaki ta lamentabel e irresponsabel – no por ta asina cu bo ta perhudica bo pais djis pasobra bo no kier tuma conseho di cierto hende of instancia.

Un otro demonstracion di esaki ta e situacion di prijsnan di awa y coriente na Aruba.

Varios luna pasa, tempo cu petroleo tabata alrededor di $30, Partido Democracia Real a hasi un yamada na nos Gobierno pa cera un acuerdo pa abastecimento di combustibel na e prijs di e tempo ey.

Esaki ta un tactica cu ta wordo usa masha hopi mes rond mundo pa garantiza stabilidad den prijs y abastecimento pa un periodo defini.

Pa nos esaki tabata un paso logico, como cu tabata obvio cu e prijs lo a bolbe subi como consecuencia di desaroyonan economico, politico y diplomatico rond mundo.

Atrobe, pa di tantisimo biaha, Gobierno di Aruba a dicidi pa no duna oido na un sugerencia positivo, y a prefera di concentra nan atencion na sigui caba cu delaster un reserva di nos pais.

Consecuencia directo di e falta di capacidad y vision di nos Gobierno ta cu awe, cu un prijs di petroleo na mas di $60, y subiendo, nos comunidad ta wordo castiga cu prijsnan innecesariamente halto di awa y coriente.

Lamentablemente, mientras cu demanda na Asia, Europa y Merca ta bai subi den segundo mitar di e anja aki, e peso riba lomba di nos famianan Arubano lo bira hopi mas den e lunanan venidero.

Contrario na esnan cu ta pretendiendo di Goberna Aruba, e equipo hoben y dinamico di Partido Democracia Real lo sa di reconoce y hasi uso di cada oportunidad pa beneficia nos isla completo y asina garantiza un mihor calidad di bida pa henter nos comunidad.

Tin hopi Arubiano cu tin lazonan estrecho cu e isla di Corsow y su pueblo. Pero como cuidadonan di Aruba, nos ta conciente di e importancia enorme di auto determinacion di un pueblo, y como tal nos a respeta e derecho di e comunidad di Corsow pa hasi nan escohencia segun nan preferencia personal.

Lo tabata hopi iresponsabel pa un ciudadano di Aruba bai mete directamente den un asunto cu ta netamente un asunto di e comunidad di Corsow. Esaki lo tabata pio ainda si esaki a wordo hasi door di un politico activo. Pero pa nos Ministro di Husticia bai hiba un campanja na Corsow encontra di e posicion di e Gobierno democratico y legitimo di Corsow ta e colmo di iresponsabilidad. Netamente sr. Rudy Croes mester por sa cu e derecho di auto determinacion di un pueblo ta algo sagrado.

Cada biaha atrobe e ministro aki ta papia y ta actua sin considera e consecuencianan cu su palabranan y su actonan lo por tin pa e imagen di su pais y su comunidad.

Manera nos a trece dilanti caba den pasado, tur esnan cu ta ocupa puestonan di responsabilidad den nos comunidad mester realisa cu nan exprecionan por tin un refleho directo y negativo riba nos isla. Esaki ta especialmente importante pa Aruba pasobra nos sa cu nos industria turistico ta depende grandemente riba e imagen cu nos ta logra proyecta. Pesey nos kier bolbe hasi un apelacion na e Gobierno pa hasi un esfuerzo pa controla e palabranan y e actuacion di e ministronan di nos pais. Despues di tur cos, e locual ta uni nos, esta amor pa nos Aruba, ta mas importante cu cualkier topico cu lo por dividi nos.

Awe mi kier toca un tema cu pa Partido Democracia Real y pa mi persona ta hop importante y cu ta toca cada un ciudadano di e isla aki directamente.

Esaki ta Aruba su debe nacional.

Apenas algun aña pasá Aruba a cumpli su di binti aniversario como pais. Den e tempo cortico ey esnan cu a goberna e pais aki a logra acumula un debe di mas di 2,000,000,000 florin, cu ta representa alrededor di 40% di nos produccion nacional anual, y  200% di nos pais su presupuesto anual.

Esaki ta un topico cu nos partido, mescos cu otro instancianan serio tanto local, como internacional a trece dilanti den hopi ocasion caba, pero nos gobierno ta sigui actua manera tur cos ta bon, bisando cu otro paisnan tin debenan mas halto (por ehempel hulanda), y cu Fitch ta duna nos un bon rating.

Tur dos e ponencianan aki ta berdad riba nan mes, pero mi ta kere ta na su lugar pa nos pone esakinan den nan contexto corecto.

Na prome lugar, manera mi a caba di bisa, Aruba a bira un pais apenas 23 aña pasá, y ta durante e tempo cortica aki nos a acumula e debe aki. Semper ora un persona responsabel hasi comparacion, e ta hasi esaki entre appel y appel, y no mester tira un peer aden di trishon pa purba bruha hende..

Obviamente Hulanda ta un pais cu tin hopi siglo di existencia, y cu durante e tempo ey a pasa den hopi cos, incluyendo guerra y otro desaster. Nan debe nacional di algo mas di 50% di GDP a wordo acumula durante tur e añanan ey. Esey ta sin menciona mes cu p.e. nan infrastructura y nan servicionan ta hopi superior na locual nos gobernantenan a logra di ofrece nos comunidad.

Pero los di esey, nos mester hasi un bon trabou – Punto !Naturalmente semper por hanja un pais of un isla cu cual nos ta compara favorablemente. Loke nos mester hasi, ta pone un meta nos dilanti, y compara nos logronan cu e meta ey. E ora nos sa si nos ta bayendo bon of no.

Aki nos por tuma e asina-yama Oduber-Swaen norm caminda nos mester tabatin un presupuesto balanza caba. Pero nos no a logra esey apesar cu Gobierno a bende varios hotel pa cientos di miyones di florin, a hipoteca Setar, y coi placa for di Elmar, a introduci un serie di medida, y a chica tur caminda cu tabatin un florin.

Pero bon, esey nos por spera di esnan cu ta bisa cu campanja ta un cos, goberna ta otro.

Pa loke ta trata e Fitch rating cu tanto Gobierno ta gusta menciona, ta importante pa tur hende compronde kico Fitch su tarea ta. Nan ta simplemente huzga e abilidad di un instancia, den e caso aki Gobierno di Aruba, pa paga bek su debe na inversionista. Nan no ta preocupa con Gobierno ta logra esey.

Cu otro palabra, si Gobierno ta bende su inversionnan, of ta chica e reservanan di e comunidad, of ta introduci un belasting tras di otro no ta importa Fitch. Fitch no ta preocupa su mes cu e calidad di bida di un comunidad, pasobra esey no tin nada di haber cu su motivo di existencia.

Partido Democracia Real SI ta preocupa cu e calidad di bida di nos ciudadanonan. Pesey no ta para pa un maneho financiero sano y responsabel pa asina comunidad ricibi su fair share a cambio di tur e placa cu e ta contribui na caha di Gobierno.

E tactica aki ta uno cu ta wordo usa masha hopi mes rond di mundo pa garantiza stabilidad tanto den prijs como den abastecimento. Esaki ta cuadra 100% cu e forma dinamico y proactivo cu Partido Democracia Real ta lucha pa un mihor calidad di bida pa henter nos comunidad. Den e caso aki door di proteha nos famianan arubano di e fluctuacionnan di prijs di petroleo riba mercado mundial.

Lamentablemente, mescos cu den tanto ocasion den pasado, Gobierno a dicidi pa ignora e conseho beneficioso aki. Y mescos cu den tanto ocasion den pasado, Gobierno a opta pa hasi absolutamente nada al respeto, preferando pa kita un yiu di tera for di trabou pa por pasa man pa e placa di Elmar y asina sigui plunder e reservanan di e pais aki.

E resultado di e falta di vision, y e falta di oido di Gobierno ta cu nos comunidad a caba di wordo confronta cu un subida substancial den prijs di tanto awa como corriente.  Manera cu nos partido a predici, demanda mundial a cuminsa subi. Como consecuencia ya caba petroleo ta yegando $60,00 atrobe, y ta virtualmente sigur cu e lo sigui subi mientras cu economia mundial ta sigui mehora. Esaki lo nifica cu e prijsnan cu comunidad ta bai paga pa awa y corriente lo sigui subi den e lunanan nos dilanti.

E idea cu nos a presenta lo a duna un alivio a termino corto te medio, y lo mester a sirbi pa proteha nos comunidad di prijsnan eleva pa un periodo te ora cu nos por desaroya solucionnan mas duradero.

A larga plazo nos pais mester kita su dependencia riba petroleo y bai den direccion di energia mas limpi. Nos ta feliz cu aki si, despues di hopi presion di parti di Partido Democracia Real, porfin a dicidi pa sigui cu e proyecto di molina di biento. Aunke nos ta conciente cu esaki lo no nifica prijsnan mas abou a corto plaza, e ta keda un desaroyo positivo cu lo duna su beneficionan nan nos comunidad.

A mediano plazo Aruba lo mester yega na un punto caminda cu:

-          Nos consumo di energia per capita ta bira menos,

-          Nos prijs pa cada unidad di energia bira menos, y

-          Nos ta usa energia mas limpi

Partido Democracia Real tin un plan completo pa por alcanza esaki.

E tempo a yega pa nos pais drenta den un era nobo di ideanan fresco, creativo y realistico envez di comete e mesun foutnan cu e cartel di MEP/AVP ta bin ta cometiendo durante e ultimo 20 anjanan, y cu a hinca nos pais den e spiral negativo cu e ta aden.

Partido Democracia Real ta ofrece pueblo un equipo hoben y dinamico cu tin e solucionnan cu nos pais mester pa por enfrenta e retonan nos dilanti, y pa sigura un calidad di bida mihor pa cada un ciudadano di Aruba.

Serge Mansur

Partido Democracia Real

Durante e ultimo dianan tin noticianan alarmante ta saliendo for di tur skina di mundo tocante e asina-yama “Swine Flu”. Esaki ta un variante di influenza (griep) cu normalmente no ta influencia ser humano. Den e casi aki, no solamente e ta influencia ser humano, pero ela demonstra di ta hopi peligroso, y hasta mortal.

Den pasado nos a yega di mira e asina-yama bird flu afecta ser humano cu resultado mortal. Pero den e casonan ey, e virus tabata pasa unicamente di parha pa ser humano, no di un ser humano pa otro. Esey a hasi cu e tabata relativamente simpel pa controla y contene.

E aspectonan alarmante di e situacion actual ta e hecho cu e virus ta pasa facil di un ser humano pa otro. Den apenas algun dia e malesa a yega New Zeeland, Francia, Espana, Israel, y masha hopi otro pais mas.

E Organizacion Mundial di Salud (WHO) a mustra su preocupacion serio pa cu e siituacion aki y ta papiando di pasonan drastico manera pone persona infecta bou di cuarantina, restrinhi viahamento y hasta seramento di frontera.

E efectonan potencial riba nos pais por inclui no solamente un caida serio den nos turismo (si casonan wordo raporta na Aruba), pero tambe un peliger severo pa e salud di nos poblacion.

Durante e ultimo anjanan comunicacion entre Gobierno y otro instancianan riba tereno di salubridad a deteriora seriamente locual a conduci na un situacion cu nos ta teme cu nos no ta prepara pa atende cu e situacion si acaso nos pais wordo afecta pa e griep aki.

E situacion aki, y e potencial peliger cu e ta presenta pa Aruba ta hopi serio y grandi. E implicacionnan ta toca turismo, salubridad, finanzas y economia.

Partido Democracia Real ta urgi Conseho di Minister pa tuma e riendanan di e situacion aki y sintas cu instancianan manera Hospital, Wit Gele Kruis, Cruz Corra y otronan pa asina formula un plan nacional pa sigura cu nos pais ta prepara pa atende cu e situacion aki.

Mescos cu tur otro Arubano, nos ta spera cu e problema aki lo wordo contene liher, y lo no tin efecto mes riba nos pais. Pero, como partido serio y responsabel, nos ta conciente cu nos mester ta prepara pa e tipo di eventualidadnan aki.

Manera semper, Partido Democracia Real ta dispuesto pa yuda den cualkier forma posibel den e proceso aki.

Serge Mansur

Partido Democracia real

Algun siman pasa, a tuma lugar den nos Parlamento reunionnan di suma importancia caminda cu a trata, entre otro, e presupuesto di nos pais. Cu otro palabra, esnan cu nos a elihi pa representa nos a dicidi riba e forma cu ta bai gasta e placa cu nos ta contribui na e aparato gubernamental di nos pais.

E decisionnan aki ta afecta cada persona riba nos isla, y ta exihi di cada parlamentario huicio, seriedad y profesionalismo.

Partido Democracia Real, mescos cu miles di nos conciudadanonan, pa di tantisimo biaha a wordo desepciona pa e falta di profesionalismo den nos Parlamento, especialmente di parti di e integrantenan di e dos partidonan “grandi”.

E fanaticismo ciego di parti di e miembronan di e dos partidonan aki ta hasi cu nan tin problema pa controla nan emocionnan, y cu nan no ta logra comporta nan mes como debe ser.

Ta importante pa senjala cu e actuacion di nos gobernantenan, como tambe nos parlamentarionan ta refleha riba henter nos pais. E comportacion di e integrantenan di MEP y AVP no ta mucho mihor cu e actuacion di e hobennan cu ta drenta den e asina-yama gangnan. E diferencia principal ta cu aki ta trata di adultonan cu sa mihor y cu ta cobra salarionan hopi halto pa sirbi nos comunidad.

Na nos parecer e interes di e comunidad aki no ta wordo sirbi door di e  comportacion malo aki. Hasta tin hopi indicacion cu e forma di actua aki tin influencianan negativo riba nos hubentud. Tur figura publico tin un responsabilidad pa duna un bon ehempel, y esaki sigur ta hasi hopi falta den nos pais.

Como e partido cu ta bringando pa un cambio real, Partido Democracia Real ta opina cu un di e cambionan cu nos mester ta un mehoracion drastico di e comportacion di nos politiconan. Esnan cu kier responsabilidad mester por carga nan mes na un forma cu ta digno di nan puesto, pero tambe di nan pais.

Aunke cu e responsabilidad principal pa mantene ordo y disciplina den Parlamento ta sinta serca e presidente di Parlamento, cada parlamentario y/of ministro mester por realiza cu e ta ocupando un puesto publico di importancia y cu e mester comporta su mes dignamente.

Obviamente tin biaha ta na su lugar pa senjala fayonan, pero esaki mester wordo hasi na un forma decente, di nivel, y enfocando riba topiconan cu ta toca nos isla. No riba famia of bida priva di contrincantenan politico.

Partido Democracia Real lo sigui enfoca riba e topiconan di interes pa nos comunidad, treciendo solucionnan realistico pa e diferente retonan cu nos pais y nos comunidad ta enfrentando.

1. AZV lo hanja su contenido real, unda e patient ta central; Tambe lo traha ariba e reduccion di e prima di A.Z.V. pa nos grandinan y esnan cu ta traha riba nan mes;

2. MEP lo adapta e pensioen di behez na costo di bida y lo elimina e belasting ariba e suma cu bo ta cobra di pensioen;

3. E tarifa di awa, coriente y telefon ta wordo reduci;

DEN E PROME ANJA DI GOBERNACION:

4. MEP lo aumenta e salario minimo y lo reduci e tarifa di belasting ariba salario minimo. Den 4 anja di gobernacion e salario minimo aki lo wordo aumenta te cu Afl.1.500,=;

5. MEP lo bolbe traha cas di Pueblo cu huurnan pagable pa esnan menos afortuna;

6. MEP lo combati criminalidad cu tur armanan legal aki na Aruba y lo soluciona na un manera realistico e problema di adiccion cronico di droga;

7. E area di Seroe Colorado lo wordo desaroya den un resort area exclusivo, cu tur facilidadnan pa Pueblo di Aruba;

8. Air Aruba: MEP lo bini cu un compania nacional di aviacion. Si tin 1% di posibilidad, MEP lo explora e posibilidad aki.

9. MEP lo bai recobra e 40 miyon florin di ajudo di desaroyo cu nos tin derecho ariba dje, conforme palabracionnan na conferencia di mesa rondo di 1983. E placa aki nos lo inverti den nos infra-structura, salubridad publico, ensenjanza y medio ambiente y asina kita e peso for di ariba nos finanzas publico;

10. MEP lo crea e incentivonan pa nos por garantisa e cuponan di trabow mediante inversionnan, unda nos lo mehora e calidad di bida.

* Den nos programa di gobernacion nos ta atende hopi mas puntonan di importancia ariba p.e. ensenjanza, social, salubridad, economico, educacion, medio ambiente, deporte y cultura.

Mirando e desaroyonan economico negativo rond mundo, e reunionnan di e anja aki por wordo considera esnan di mas importante te ainda. E metanan principal e anja aki ta pa stabiliza e economia mundial y pa yuda crea un fundeshi solido pa un crecimento economico stabiel y duradero.

Si e representantenan logra yega na consensus riba e pasonan cu lo mester tuma pa logra e metanan aki, e efectonan positivo lo wordo sinti den e ultimo lunanan di e anja aki y durante 2010. Pero hasta cu un consensus amplio nos por ta sigur cu Aruba ta bai sinti e efectonan di e recesion aki hopi mas fuerte cu te ainda ta e caso.

Si acaso no logra yega na un consensus riba algun di e temanan aki lo por tin efectonan hopi negativo riba e confianza mundial den nos economia, y esey lo nifica un recesion hopi mas profundo y duradero pa Mundo, pa Merca, y sigur tambe pa nos isla.

Naturalmente nos ta spera cu e delegadonan logra yega na acuerdonan bon pa asina nos por sera e anja aki ainda cu positivismo, pero di locual nos por a tende te ainda tin diferencianan importante entre algun di e paisnan mas poderoso. Aki mi te referi na Francia y Alemania di un banda, y Merca cu Inglaterra di otro banda.

Si acaso e diferencianan aki no wordo resolvi nos por hanja nos mes den un situacion realmente doloroso cu lo por tin efectonan hopi malo pa nos economia, nos gobierno y nos comunidad. E efectonan aki lo por inclui problemanan financiero grandi tanto den sector priva, como esun publico cu lo por conduci na perdida significante di empleo riba nos isla.

Mi no ta trece e realidad aki dilanti pa spanta of alarma hende, pero mas bien pa alerta tur hende principalmente nos gobernantenan. Te ainda ta parce cu nos Gobierno no ta realiza e magnitud di e situacion, y no ta preparando nan mes y nos pais debidamente.

Tin decisionnan importante cu mester wordo tuma pa por suavisa e sla cu lo por ta caminda, y nos kier urgi nos gobernantenan pa lubida e pleitamento interno pa por tuma e decisionnan cu lo mester evita cu famianan Arubano ta bai hanja nan mes den un situacion mas doloroso cu hasta BBO a causa!

Nos sa cu despues di September Aruba ta bai tin un Gobierno diferente, y den temponan normal nos lo warda pa e cambio cu ta na caminda pa tuma e pasonan necesario. Pero e situacion actual ta rekeri accion inmediato pa percura pa nos comunidad wordo protehi di e desaroyonan cu tur hende mester por wak na caminda.

Nos sa cu nos gobernantenan stima nan isla, y nos ta spera cu e patriotismo lo vence tur e divisionan cu lo por existi.

Mi a yega di bisa varios biaha den pasado, y mi ta bolbe ripiti, nos no por sigui hasi e mesun foutnan y spera cu un milagro lo cai for di shelo pa scapa nos. Pa nos pasa den e tormenta aki ta imprecindibel pa nos traha duro y pa nos traha uni na beneficio di e comunidad aki.

Lo ta imperdonabel si nos wordo sorprendi pa un crisis cu nos ta wak ta bin.

Pesey awe Partido Democracia Real ta urgi nos gobierno pa sinta hunto cu partidonan di oposicion y tambe cu partnernan social y comercial pa conhuntamente yega na un consensus tocante e pasonan cu nos lo tuma den caso cu e crisis aki yega na nos.

Mester yega na un plan nacional cu lo conta cu sosten di e Gobierno actual, di e gobierno cu ta bai sinta fin di e anja, y tambe di sector priva.

Nos pais ta uno chikito y precisamente pesey nos mester hasi uso di tur nos recursonan pa enfrenta e problema aki. Pa loke ta trata recursonan intelectual, esakinan ta parti den tur e partidonan politico na Aruba, pero principalmente den sector priva.

Partido Democracia Real ta convenci cu si nos uni tur e recursonan aki, tur e conocimento aki, nos sali lo mas mihor posibel for di e periodo dificil aki.

MANEHO LABORAL

Parti VII di e Analisis di Programa di Gobernacion di MEP di 2001

Esaki ta e di shete capitulo den e serie di articulo cu Partido Democracia Real ta preparando caminda nos ta analisa e intencionnan y e promesanan di partido MEP y compara esakinan cu locual a sosode durante e ultimo 7 aanan durante nan Gobernacion.

E capitulo aki ta hiba e titulo “Maneho Laboral”, y ta trata di varios topico relaciona cu maneho laboral. Nos lo analisa esakinan un pa un.

E capitulo ta habri bisando lo siguiente: “E obheto fundamental ta pa trece ordo den sector laboral a corto, mediano y largo plazo, pa asina por garantisa prosperidad pa un y tur. Puntonan di accion di Gobierno ta pa stimula e harmonia nesesario entre trahador y empresarionan; garantisa nivelnan real di poder di compra y promove mehoracion di condicionnan secundario di trahadornan; y garantisa tur trahador e cumplimento di e derechonan legal laboral como tambe derechonan social necesario”.

Nos ta hanja cu ta sumamente yamativo cu NINGUN caminda ta menciona productividad di nos mercado laboral.

Pero pa enfoca riba e metanan cu Gobierno a delinea ta papia esencialmente di:

-       Trece ordo den sector laboral,

-       Garantiza nivel di poder di compra,

-       Mehora condicionnan secondario, y

-       Garantiza e derechonan laboral y social di e trahador.

Pa loke ta trata trecemento di ordo, e punto aki ta uno cu ta imposibel pa determina si “ordo” a mehora of no. Si nos por constata cu de vez en cuado parce cu falta ordo entre nos propio gobernantenan.

Poder di compra di e clase trahador a bai atras basta drasticamente durante e ultimo anjanan. Un causa di esaki sigur ta e prijsnan eleva di petroleo y tur e consecuencianan di esaki. Pero sin duda e causa principal di e perdida di poder di compra ta e propio gobierno su deroche di nos comunidad su placa y su sed continuo pa ranca mas placa di saco di e comunidad trahador. E hamber continuo pa placa a hasi cu Gobierno a introduci un cantidad di medida riba lomba di e comunidad Arubano. Esaki a culmina cu introduccion di e afamado BBO na Januari 2007.

E transferencia desproporcional di fondonan di sector priva pa esun publico a hasi cu hopi consumidor Arubano a perde alrededor di 25% di nan poder di compra (y den algun caso hasta mas!) durante e ultimo 7 anjanan. Esey ta igual na e perdida di 3 luna di salaris durante un anja. Esaki, na su turno a conduci na un aumento drastico di pobreza na Aruba. Esey ta manifesta su mes den un deterioro di nos pueblo su dieta (y salud), hopi cas di famia cu a bai findishi, un aumento den actonan fuera di lo comun (includendo criminalidad), y otro efectonan devastador pa nos comunidad.

Pa loke ta trata mehoracion di e condicionnan secondario di e sector laboral. Gobierno a nenga di hasi uzo di un oportunidad unico pa introduci un pensioen den sector priva. Tur e sindicatonan di sector priva, como tambe ATIA, AHATA, SNBA, KvK, etc. a yega na un consensus pa introduci un pensioen den sector priva. Esaki a wordo presenta na Gobierno, pero Gobierno a faya barbaramente den su tarea pa traha pa e pueblo trahador y pagador di belasting y a nenga rotundamente di asumi su resposabilidad den esaki.

Mas aleu ta menciona cu lo garantiza e derechonan laboral y social di trahador. Aki mester bisa cu a pasa algun ley positivo. Entre esakinan ta figura e ley cu ta aumenta “zwangerschap verlof”. Tambe tin un serie di cambio cu a wordo proponi door di Ministerio di Labor. Esakinan generalmente ta cambionan cu ta zona simpatico, pero cu lo sirbi pa stroba aun mas e aumento di productividad cu tanto nos pais mester. Ta bergonzoso cu durante e ultimo 20 anjanan, bou di gobiernonan di AVP/MEP, productividad di nos mercado laboral no a aumenta ni un porciento. Esaki ta hasi cu Aruba ta cayendo atras compara cu nos competidornan.

Tambe e programa di MEP ta menciona e necesidad pa flexibilidad. Pero e ley di LTU cu e Gobierno a introduci a hasi cu nos economia ta wordo strangula door cu no tin trahador. Riba esey, e calidad di trahador ta wordo disminui como cu cada tres anja mester busca hende nobo cu mester sinja nos idioma, hanja training di nobo, etc. E tipo di iniciativanan aki di parti di Gobierno ta ilustra e Gobierno su falta di comprendimento di e necesidadnan di nos sector priva.

Yegando final di e capitulo ta menciona entre otro, “..consulta cu gremionan comercial y sindical..” Mester admiti cu algun ministerio (includendo esun di Labor) tin mihor comunicacion cu sector priva cu otro, pero esaki no ta suficiente.  Pa por maneha bon, mester tin un balance. Lamentablemente e gobierno aki ta tipifica su mes door di hasi loke ta zona mas popular envez di locual ta mihor pa nos pais.

Por ultimo ta menciona e necesidad pa cifranan correcto y na tempo. Esaki en berdad ta un necesidad. Lamentablemente, aki tambe nos por nota cu esaki no a tuma lugar. Si acaso tin cifranan bon disponibel, esakinan no ta wordo divulga.

Den e capitulo aki nos por a nota cu atrobe e (bon) intencionnan di Gobierno ta wordo stroba door di falta di capacidad combina cu desesperacion pa placa. Di tur locual Gobierno kier a bini cun’e, masha poco a wordo logra, mientras cu na basta ocasion net lo contrario a wordo hasi.

Lamentablemente tanto MEP como AVP tin e mal  custumber di pretende di tuma e advertencianan aki na serio ora cu nan ta den oposicion, pero ora nan yega den Gobierno nan ta lubida nan promesanan di campanja y ta ignora tur hende.

Durante e ultimo 20 añanan di crecimento economico fuerte e cartel AVP/MEP a logra di no solamente gasta tur e entradanan di Gobierno na un forma sumamente iresponsabel, pero na mes momento a hipoteca nos isla y su ciudadanonan pa mas di 2,000,000,000.00 florin. Esey ta representa un debe di mas di 20,000.00 florin cada persona biba na Aruba. Cu otro palabra, un famia di cuatro persona tin un debe di 80,000.00 florin ta colga riba su cabez danki na e mal maneho di e cartel AVP/MEP.

Riba esaki, y especialmente durante e ultimo 7 añanan e Gobierno di MEP a presta di no solamente malgasta tur e entradanan di belasting y fiya cientos di miyon di florin adicional, pero tambe a impone riba nos comunidad un serie di medida culminando cu e afamado BBO di Januari 2007.

Pero no a stop na esey, ni fiando placa y imponiendo medida, nan sed pa placa di e comunidad arubano no a wordo sacia. Pa por yega cada vez na mas y mas placa, e Gobierno aki a agota tur e reservanan cu nos pais a logra acumula atravez di varios decada. Aki nos por mira con Gobierno a bende shares den Hyatt, Marriott y Radisson y a ricibi pa esakinan cientos di miyones di dollar. Tur a bai perdi.

Gobierno den su desesperacion a bai purba plunder Banco central su reservanan. E Presidente e tempo ey a para nan, y a perde su empleo. Despues a bai pasa man pa e reservanan di WEB cu Elmar. E director di Elmar, porcierto un Arubano hopi profesional, den su afan pa defende e interes di e empresa cu e tabata maneha a wordo sacrifica sin mas pa asina e Gobierno di MEP por a pasa man pa e reservanan di Elmar.

Awe nos por constata cu despues di 20 aña di crecimento economico fuerte nos pais su entrada di pasado (e reservanan) a caba, nos pais su entrada di presente (belasting) ta wordo desperdicia, y nos pais su entrada di futuro a wordo prestá y gastá caba. Esencialmente e recursonan di nos comunidad a wordo geplunder durante un periodo cu nos mester por a crea reservanan pa por enfrenta e temponan dificil cu tur pais de vez en cuando ta pasa aden.

Lamentablemente awe, drentando den un periodo dificil, quizas e temponan mas dificil economico/ financiero cu nos lo enfrenta den nos bida, nos tin cu constata cu nos ta bai tin di enfrenta e retonan aki virtualmente sin reservanan financiero y sin espacio pa fia!

E mal maneho di nos recursonan financiero a hasi cu nos gobierno ta esencialmente uno limosnero cu tin cu roga pa ayudo financiero hasta ora cos ta bon. Awor cu cos ta birando malo, kico lo para cu nos?

A bira tempo pa nos para e wega di ping-pong di AVP / MEP y scohe un Gobierno di hendenan cu tin e capacidad pa maneha, cu ta liber di obligacionnan na sponsor, y cu tin e dinamismo y e iniciativa pa trece nos isla bek riba a caminda corecto pa asina por logra un mihor calidad di bida pa cada segmento di nos poblacion.