Preparacion / Experiencia
Formacion | Educacion | Experiencia profesional | Experiencia pafor di trabou | Calidadnan personal
Mi ta kere fuertemente cu un Gobernante of Parlamentario exitoso mester dispone di un cantidad di talento y tambe di capacidad cu ta prepara e persona en cuestion pa por eherce su funcion debidamente. Na mi parecer ta imprecindibel pa nos pueblo votador exihi di e candidatonan politico pa nan por splica pakico nan ta considera nan mes capaz di eherce e funcion cu nan lo por wordo yamá pa eherce.
Den e articulo aki lo mi duna un splicacion di mi educacion y mi experiencia, y splica pakico mi ta kere cu mi ta prepara di punto di bista di educacion, experiencia y otro factornan pa por hasi un trabao bon pa nos pais. 
Mi formacion a tuma lugar den un hogar cu un tata Arubano (Alex E. Mansur, q.e.p.d.), y un mama Hulandes (Ola M. Mansur-van der Naaten), y rondoná pa shete ruman. Nos tur a sinja di nos mayornan e importancia di disciplina, cortesia y responsabilidad na bo comunidad.
Ora cu un famia ta grandi, di mes tur hende mester sinja comparti cu otro, mester tin disciplina y mester sinja tene consideracion cu necesidadnan di otro. Esakinan ta factornan cu nos tur a sinja. Y considerando cu nos tur ta bon cu otro te awe, ta evidente cu nos mayornan a hasi un bon trabao den esey.
Ambos di mi mayornan a demonstra di kere den servicio na comunidad. Mi tata door di ta activo den un cantidad di organizacion deportivo, social y comercial, mientras cu mi mama tabata un juffrouw di school y a duna su tempo como voluntario pa varios instancia caricativo (algo cu e ta hasi te awe). Esakinan ta ehempel cu mi generacion tambe a sigui.
Educacion
Mi educacion a hibami School Reina Beatrix pa despues bai Colegio Arubano. Despues di tres aña na Colegio Arubano mi mayornan a dicidi cu un Academia Militar na Merca lo por a yuda instila un tiki mas disciplina den mi. 
Mi a bai Merca na aña 1981, y a bira un estudiante na Castle Heights Military Academy, un Academia Militar na estado di Tennessee.
Akinan, banda di mi estudio, mi a ricibi instruccion den aspectonan militar, mientras cu mi a forma parti den 
e equiponan di voetbal y wrestling, como tambe e equipo di tiro (rifle team) na e school. E disciplina en berdad a yuda, y mi a gradua na aña 1983 cu un Academic Diploma cu mi nomber riba “Headmaster’s List”, “Honor Roll”, y como miembro di “National Red Key Honor Society”.
Despues di esaki mi a bai University of Miami na Coral Gables, Florida 
pa mi estudio universitario. Na University of Miami mi a forma parti di un team di voetbal, y mi tabata miembro di Zeta Beta Tau Fraternity.
Mi a gradua na 1988 cu mi diploma den Business Management & Organization.
Experiencia Profesional
Na comienzo di aña 1989 mi a cuminsa traha na E. Leon Jimenes, un subsidiario di Philip Morris International, na Republica Dominicana como Marketing Trainee. Mi a traha den mercadeo di tanto cerbes como sigaria.
Den algun aña mi a alcanza e puesto di Brand Manager di e sigaria number dos den e pais. Mi responsabilidadnan tabata inclui planificacion di produccion, promocion, supervision di venta, mercadeo, publicidad, prepara presupuesto, supervisa filmacion di comercial, maneho di personal, etc. Mientras cu mi tabata na Republica Dominicana mi a participa na varios entrenamento, seminario y convencion pa sigui desaroya mi conocimento.
Durante e añanan cu mi tabata traha na Republica Dominicana mi a bolbe Aruba na Augustus 1992 pa casa cu Dalilah Croes cu cual mi tin awe mas di 15 casá. Mi señora a bai biba cumi na Santo Domingo despues di nos matrimonio.
Aya mi a keda traha te September di 1993, luna cu nos a bolbe Aruba caminda mi famia a ofrecemi un trabao na Superior Tobacco Co. N.V. Apesar cu mi a pasa algun aña hopi placentero na Republica Dominicana, y cu mi a enamora di e pais y su hendenan, mi tabata tremendo feliz cu e oportunidad pa bolbe mi isla natal.
Na mi trabao nobo mi a traha mas di un aña bao di e Gerenta General di e empresa, señor Michael Kuiperi cu a guiami y preparami pa mi asumi su posicion despues di su retiro na final di 1994.
Desde 1995 te cu Mei di 2007 (ora cu e doñonan a bende e empresa) mi a traha como General Manager di Superior Tobacco Co. N.V. na Aruba y su dos empresanan hermana na Corsow. Durante e tempo aki e empresanan a crece consistentemente, y a wordo hasí mas eficiente y productivo.
Mi responsabilidad den esaki tabata total: planifica, pone pedido, negocia contrato, maneha personal, controla gasto, mercadeo, enfin: Tur aspecto di maneha un empresa, cu esencialmente ta consisti di maneha hende, maneha recursonan financiero, maneha logistica, maneha informacion y maneha organizacion. Ta asina cu cada un di e tres negoshinan aki a produci ganashi aña tras aña mientras cu mi tabata responsabel pa nan.
Experiencia pafor di trabou
Desde cu mi a bolbe Aruba mi a participa den e comision di Stimaruba pa establece loke awe ta Parke Nacional Arikok. Tambe mi a bira miembro di Kiwanis Club of Palm Beach, organizacion caminda mi a eherce
varios funcion (incluyendo Presidente), y cu mi ta miembro te awe. Ademas mi a bira miembro di directiva di ATIA, y a fungi como su presidente pa tres aña. Durante e anjanan cu mi persona a fungi como presidente di ATIA, e miembrecia di e Ascociacion a crece substancialmente, mientras cu e situacion financiero a mehora dramaticamente. Na mes momento e edificio di ATIA a hanja un upgrade.
Sin excepcion, cada entidad (sea empresa, club of asociacion) di cual mi a asumi su liderazgo a wordo maneha na un forma financieramente responsabel, mientras cu e funcionamento di e organizacion a beneficia.
Mi ta convencí cu e combinacion di educacion (tanto na Aruba como na Merca) y experiencia (den exterior y localmente) a preparami debidamente pa por hasi un trabao bon pa nos pais. E hecho cu mi a biba 7 aña na Merca y casi 5 na Republica Dominicana ta hasi cu mi ta mira hopi asunto basta mas amplio cu mayoria otro politico na Aruba. Adicionalmente mi ta tene mi mes altanto di desaroyonan internacional, como cu esakinan con cu bai ta afecta nos pais.
Na mes momento mi trabao den Kiwanis a habri mi wowo pa e necesidad cu ta existi den nos comunidad, mientras cu mi añanan den directiva di ATIA a hasi cu mi tin hopi conocimento di e problemanan cu nos pais ta confrontando tanto den sector priva como
den sector comercial.
Calidadnan personal
Pero naturalmente conocimento, educacion y experiencia no ta suficiente pa un persona ta un bon gobernante of un bon parlamentario. Banda di esakinan ta imprecindibel pa un candidato posee patriotismo, honestidad y un caracter fuerte.
Patriotismo ta necesario pa conoce kico ta e interes di bo pais y di bo comunidad, y pa por identifa fuertemente cu e interes aki.
Honestidad ta papia pa su mes. Unda cu bo wak na Aruba, bo por mira politiconan cu ta cana rond cu pin di nos bandera riba nan bunita bachi, mientras cu nan boca ta yen di palabranan bunita y patriotico. Lamentablemente ora di yega na demonstra nan amor pa nos Patria pa medio di hecho y decision, mucho hopi biaha nan honestidad ta laga nan (y nos pais) na caya.
Un caracter fuerte ta pa completa e pakete. Ta bon conoci cu un puesto di poder ta trece cune hopi tentacion. E tentacionnan aki ta hopi dificil pa hende cu no ta custuma di anda cu esaki, mas ainda si su caracter ta debil.
Den mi caso, mi ta tribi di bisa cu mi ta posee tur tres e calidadnan aki. Si un dia mi asumi un posicion lo mi tuma e decisionnan cu den mi honesto opinion ta cumbini nos comunidad.
Mi ta priminti cu no ta bai tin sponsor ni campanjador ni amigo ni famia cu lo desviami di esey.
Loading ...
