Serge Mansur

Breve Historia di Famia Mansur na Aruba

E prome Mansur cu a yega Aruba tabata Miguel Mansur cu na aña 1902 a bini Aruba for di Venezuela acompaniá pa su señora, Sara, y nan yiu di apenas 7 luna, Elias.

Papa Miguel, manera e tabata wordo yamá cariñosamante, a bai biba den un cas di torta gehuur na Santa Cruz, serca di e veld di Estrella na Papilon. Casi di biaha cu ela yega Aruba, papa Miguel a drenta den un “partnership” cu e conocido Shon Fefe Croes y a cuminsa bende un variedad di articulo bishitando cas pa cas, usando un burico como medio di transportacion. Entre e articulonan cu papa Miguel tabata bende tabata e asina yamá sinkuria, un sombre tradicional cu varios persona tabata traha p’e y e tabata exporta nan pa famia Maduro na Corsow.

Despues di algun aña, mientras cu e negoshinan tabata crece, Papa Miguel a dicidi di muda pa playa caminda cu mayoria actividad comercial tabata tuma lugar. Na playa ela habri un tienda yamá “La Maravilla” caminda awe ta Botica del Pueblo den Caya Betico Croes (e tempo ey Nassaustraat).

Papa Miguel tabata un di e fundadornan di Camara di Comercio di Aruba.

E yiu mayor di papa Miguel a bai Libanon cu 6 aña serca su welo pa su educacion. Na Aruba a nace cinco otro yiu; Michel, Jossy, Farog, Manira y Sarah. Farog, eventualmente a casa cu Eva, y ta tata di Myrna, John, Glenda y Farida Mansur, mientras cu Manira ta mama di Michael, Chicha, Buchi, Jossito y Nibia Muyale.

Cu 15 aña Elias a bolbe Aruba, y di biaha a cuminsa traha cu su tata. Cu su 18 aña ela dicidi di cuminsa riba su mes, bendiendo zapato, sigaría, whiskey, harinja, lechi, tela, manteca, keshi, etc. Tambe durante un periodo di e decada di ‘60, Don Elias a hasi negoshi cu exportacion di koffie Colombiano pa Merca. Tin un storia cu e tabata bende tanto koffie cu algun cliente lo a bini Aruba pa bin bishita e plantacionnan di koffie akinan…

Atravez di e añanan Don Elias a cuminsa varios negoshi na Aruba, Corsow, Bonaire, St. Maarten, y a hasi inversion na varios otro lugar mas, pero semper cu su cede na Aruba, involucrando su mes den su comunidad, por ehempel como miembro di directiva di Camara di Comercio hunto cu su amigonan Juancho Irausquin, Mario Arends y otronan

Don Elias Mansur a casa cu Damia Moauwad na aña 1930, y nan a hanja ocho yiu. E mayor tabata Alex Elias, siguí pa Ruben, Jossy, Sarah, Damia (Rina), Elias (Don), Luis y Miguel. Mayoria di e yiunan a participa den un of otro forma den e negoshinan, particularmente e dos yiunan mayor.

Don Elias Mansur tabata semper conocí pa su talento di negocia y tambe pa su generosidad. Pero mas cu esey e tabata conoci como un persona cu un huicio increible. Casi tur comerciante tabata bai serca Don Elias pa conseho y hasta pa arbitrahe den casonan di conflicto. Apesar di su modestidad y discrecion, Don Elias a ricibi varios reconocimentonan, entre nan “Officier in de orde van Oranje-Nassau” (algo hopi inusual como cu semper ela keda carga su nacionalidad Venezolano). Dia cu ela ricibi e condecoracion aki a menciona specificamente su arbitrahe entre comerciantenan na Aruba.

Varios di e yiunan di Don Elias tabata hopi activo den comunidad den un cantidad di actividad: Alex semper tabata activo den organizacionnan deportivo (ABBA), social (S. V. Caribe), comercial (AMRA) y caricativo (Kiwanis), Ruben tabata activo den organizacionnan caricativo (Rotary) y comercial (Presidente di Camara di Comercio), Don tabata presidente di ATIA y tambe vak minister den Gobierno Antiyano (cu MEP) y atrobe vak minister pa e prome gabinete Arubano (cu e.o AVP), mientras cu Miguel tabata presidente di Camara di Comercio como tambe comisario di e.o. Banco Central y Aruba Ports Authority.

Mayoria di e yiunan di Don Elias a casa y a hanja yiu di nan mes, hasiendo cu awe tin 26 nieto di Don Elias Mansur tanto na Aruba como den exterior, di cual mayoria tambe ta casá y cu nan mes yiu atrobe, locual ta representa e di cinco generacion desde Papa Miguel su yegada na Aruba mas di un siglo pasá.

Alex Mansur, e yiu mayor di Don Elias, a casa cu Ola van der Naaten, e tempo ey juffrouw di school, y nan a hanja ocho yiu; Angele (Sasha), Alex Jr., Valeska, Stefanja (Fanja), Farid, Serge, Gavril y Quentin (Tino), cu entre nan atrobe tin 19 yiu (dus nieto di Alex cu Ola). Di esakinan varios ta biba na Aruba, mientras cu algun ta biba na Merca y Hulanda.

Ola van der Naaten ta un yiu di Anton & Meta van der Naaten. Anton tabata un hulandes cu a bini Aruba pa maneha loke awe ta Elmar, tempo cu e empresa tabata pertenece na John Eman. Su señora, Meta, tabata aleman. Nan a hanja cuatro yiu; Inge, John, Ola y Lillian van der Naaten

Nos tur como yiu di Alex y Ola Mansur a sinja di nan e balor di union familiar como tambe e importancia di contribui positivamente na nos comunidad.

Nos ta e di cuatro generación di Mansur na Aruba, y aunke nos ta keda orguyoso di nos raisnan Libanes, Hulandes y Aleman, nos tur ta considera nos mes Arubano prome y despues di tur cos, y nos tur stima nos isla inmensamente.