Serge Mansur

Nothing in the world is more dangerous than sincere ignorance and conscientious stupidity.

Martin Luther King, Jr.

Mi a wordo informa cu durante cu mi tabata ausente for di Aruba, e partido den Gobernacion a hanja ta bon pa di tantisimo biaha saca un nota di prensa atacando mi persona. Mescos cu tur e otro biahanan, esaki tambe a sali sin firma y sin cu ningun persona ta suficiente balente pa para responsabel pa su contenido. Pero bon, esey ta e “modus operandi” di MEP pa basta tempo caba: susha nomber di hende drechi y sconde tras di anonimidad.

Aunke no ta nada nobo, tog cada vez atrobe ta decepcionante pa wak cu esnan cu tin e encargo di maneha e recursonan di nos comunidad na beneficio di henter e isla aki ta prefera pa uza nan tempo y e recursonan di nos pais pa ataca esnan cu nan no gusta.

E articulo ta cuminsa cu un dicho bon conocí (pero mal skirbi), esta “Aunke con grandi e mentira ta, e berdad semper ta alcanz’e na caminda”. Ta pesey mi a dicidi di skirbi e reaccion aki pa asina alcanza e “mentiranan” di e articulo en cuestion.

Den cada un di e entrevistanan cu mi a otorga ora cu e noticia di e cierre di e fabrica a bira conoci mi a splica cu no tin sentido pa tin dos fabrica chikito, y cu nos mester a dicidi na cual di e islanan nos lo kier a keda produci. Como Arubano lo nos a prefera di a keda produci na Aruba, pero tabata un decision puramente comercial pa concentra produccion den nos mercado mas grandi, caminda e fabrica ta mas moderno, y caminda ta mas barata pa hasi negoshi.

Pa loke ta trata e argumento cu na Corsow tambe tin BBO (of OB manera e ta conoci eynan), esnan cu a skirbi e articulo en cuestion obviamente AINDA no ta compronde kico e efectonan ta di e ley cu tanto nan a forza pa introduci.

Pakico mi ta bisa esey? Simpel: Si mi produci un producto na Aruba pa mi bende na Corsow, lo mi mester paga BBO akinan PLUS OB na Corsow, mientras cu mi lo paga BBO riba e productonan destina pa mercado local. Na otro banda si mi produci e producto na Corsow, lo mi paga unicamente BBO pa e productonan cu ta bai Aruba, y OB riba esnan cu ta pa Corsow. Cu otro palabra, y manera mi a trece dilanti for di aña pasa, BBO ta castigabo si bo exporta door di ponebo paga belasting dobbel.

Ta tristo cu e mesun partido cu a introduci e ley aki te awe no ta compronde kico nan a hasi. Mi a ricibi noticia caba di otro empresa cu (contra nan deseo) ta bai sera nan porta na Aruba pa produci den exterior. Ya nan por spera di wordo ataca door di e mesun partido moralmente y intelectualmente bancarota cu a forza nan pa tuma e paso aki.

Encuanto e ponencia paranoico di cu hende ta purba deroca e Gobierno actual, semper mi a bisa cu e Gobierno aki ta uno legitimo y cu e mester sinta cuatro aña. Claro, nunca mi no a sconde mi opinion cu e Gobierno aki ta uno horiblemente malo, pero esey ta un risico cu bo ta core den cualkier pais democratico caminda den campaña bo ta bisa algo, y den Gobernacion bo ta hasi algo completamente diferente.

Mi kier ta hopi cla cu esaki ta mi opinion personal y ami so ta responsable p’e. Mi ta den e posicion pa dune honestamente como cu mi no tin nodo di gaña ni chupa pa voto. Ni ami ni ningun familiar dimi no ta come ni bebe di e placa di belasting cu e comunidad aki ta wordo forza pa paga nan un grupo di probechador cu ta carece di capacidad pa goberna nan mes partido corda e pais aki.