Serge Mansur

 Awe mi kier a toca dos tema cu Partido Democracia Real ta considera di hopi importancia.

E prome di esakinan ta e presupuesto nacional pa 2009 cu e anja aki a wordo entrega na Parlamento na tempo. Un logro cu sigur merece elogio.

E presupuesto di 2009 contrario na e asina-yama “Oduber-Swaen norm” ainda ta premira un deficit financiero significante di mas di 30 miyon florin compara cu alrededor di 50 miyon na 2008. Ta berdad cu e deficit aki ta mas chikito cu den anjanan anterior, pero e preguntanan clave ta si e presupuesto ta sano, y si e ta realistico.

E puntonan cu a yama Democracia Real su atencion inmediatamente ta cu e inversion di parti di Gobierno a wordo corta masha hopi mes. Di 31 miyon na 2007 pa 25 miyon e anja aki te na 15 miyon otro anja. Na mes momento gastonan di personal di Gobierno ta sigui mustra un tendencia creciente, mientras cu nos pais su gastonan di interes riba nos debe ta creciendo rapidamente.

Na 2009 ta wordo premira cu nos gastonan na interes lo bai ta alrededor di 130 miyon florin. Esaki ta nifica cu e malgastamento di placa di e ultimo 20 anjanan ta costando nos pueblo mas di 350 mil florin tur dia na interes. Esaki ta inclui diadomingo y dianan liber. Anto corda bon: Esaki no ta pagamento di e debe, sino interes so!

Un otro punto cu ta resalta ta cu Gobierno ta spera di hanja un entrada extra di 20 miyon florin di “verkoop on. roerende goederen en grond”. Traducí na papiamento esaki  kiermen benta di bestuurscollege. Cu otro palabra, e deficit financiero structural di gobierno ta creciendo ainda! Si no bende e edificio aki, e deficit lo surpasa 50 miyon florin.

Dus si nos mira e presupuesto den su totalidad, nos por conclui cu e gastonan ta sigui subi, y cu inversionnan necesario ta bahando, mientras cu e deficit operacional di Gobierno ta birando pió.

Nos mester djis para keto un rato y realiza cu nos Gobierno su inversionnan den nos pais ta 15 miyon, mientras cu su gastonan di interes na instancianan financiero, tanto local como internacional ta casi 10 biaha mas hopi cu esey.

Ta pesey nos ta paga belasting? Pa nos ricibi un florin di inversion den nos pais pa cada 9 florin cu nos tin di paga na interes? Senjores, esaki ta muestra di un ineptitud total combina cu falta di sinceridad.

Pero lo mas preocupante ta cu ta dudoso cu nos ta bai logra e entradanan cu a wordo presupuesta. Cifranan preliminar di turismo pa resto di e anja aki y otro anja ta espantoso, y mirando desaroyonan mundial tin un bon chance cu 2009 ta bai ta un anja hopi dificil pa tur hende. Dus nos ta duda cu Gobierno ta bai logra cumpli cu e presupuesto manera ela wordo entrega na parlamento.

E di dos punto ta relaciona cu e mesun tema aki, y esaki ta e suma cuantioso cu Gobierno di Aruba ta bai ricibi di Hulanda. Ta trata aki di e placa cu a wordo genera cu e benta di e propiedad caminda Marriott Hotel ta situa.

Democracia Real a tuma nota di e declaracionnan di Premier Oduber pa loke ta trata e uso di e fondonan aki, y aki mester bisa cu den lineanan grandi nos ta di acuerdo cu e intencionnan di Gobierno pa loke ta trata e uso di e fondonan aki.

Tanto mudamento di haf como bahamento di nos debe nacional ta en berdad beneficioso pa nos comunidad.

Pero adicionalmente nos lo kier mira tambe pa Gobierno aumenta e inversion den publicidad den exterior pa un tempo limita pa por purba minimiza e efectonan negativo cu economia mundial lo por tin riba nos pais. Esaki no mester encera tuma mas hende na trabou, pero simplemente inverti mas den publicidad. Nos ta sigur cu ATA lo por aloca e fondonan aki na un forma efectivo na beneficio di nos pais.

Tambe nos ta mira un necedidad enorme den educacion. Mester di mihor mantencion di edifionan, compra di material, como tambe preparacion di docentenan. Esakinan ta inversion cu sigur lo paga nan mes bek y lo beneficia nos comunidad enormemente.

Ademas, nos ta kere cu ta importnate pa Gobierno inverti den fuentenan alternativo di energia. Riba e tereno aki nada no ta pasando. Nos por a scucha un plan di gas for di Colombia, pero esey a resulta di ta ca’i loco.

Pa finaliza; nos kier corda Gobierno cu aki ta trata di un caso cu lo no ripiti, y pesey ta vitalmente importante pa eherce disciplina y usa e fondonan aki lo mas productivo posibel.

Serge Mansur

Partido Democracia Real

RELATO DI PRENSA

PARTIDO DEMOCRACIA REAL

Partido Democracia Real  a compronde cu durante un programa radial semanal na un radio emisora hopi scuchá, sr. Nilo Croes di partido MEP a papia ampliamente riba Partido Democracia Real (atrobe).

Naturalmente na un pais liber y democratico manera esun di nos, tur hende e instancia ta liber pa expresa su opinion. Obviamente nos partido ta respeta e derecho importante aki, y semper lo sigui respeta esaki. Naturalmente, esey ta nifica cu nos tambe tin e mesun derecho di trece esun di nos dilanti.

Aunke nos ta purba tene nos mes semper riba e issuenan cu ta confrontando nos pais, y e situacion deplorabel cu casi binti aña di gobernacion sub-mediocre a crea, nos ta kere cu tin biaha ta importante pa aclarea un k’e otro.

Aparentemente sr. Croes den su programa a menciona cu nos lider sr. Andin Bikker como tambe mi persona, ta “elitista”, y aparentemente su punto tabata cu nos ta hende di bon bida. Partido Democracia Real ta kere ferventemente cu tur Arubano tin derecho ariba un bida bon. Pero naturalmente esaki mester wordo logra pa cada ken a base di trabao duro y honesto, y no a base di favoritismo politico.

Como ehempel sr. Croes lo a menciona Aruba Lions Club di cual sr. Bikker ta un miembro (mescos cu mi persona ta miembro di Kiwanis). Lo ta importante pa sr. Croes compronde cu e clubnan aki (mescos cu varios otro den nos comunidad) ta organizacionnan caricativo pa cual centenares di Arubano ta traha a base voluntario pa yuda esnan di mas necesidad den nos comunidad. Si acaso sr. Croes no gusta cu tin hende cu ta duna nan tempo y esfuerzo na beneficio di nos comunidad, esey ta su derecho, pero nos si ta sinti cu nos tin tur derecho di traha pa nos pueblo. Ademas di esey, nos ta kere cu nos mester encurasha trabou comunitario, y no ataca esnan cu ta duna nan tempo gratuitamente na nos pueblo.

Sr. Croes a toca tambe e tema di Sra. Anna Marila Lacle cu a uni cu nos partido siman pasá. Pa cu e tema aki sr. Croes a purba hasi e caso cu sra. Geerman no tin nada di hasi den nos partido como cu e ta un persona di campo, mientras cu nos partido ta uno “elitista”.

Partido Democracia Real ta lamenta cu e partido na mando di nos pais, y cu ta responsabel pa bienestar di cada Arubano ainda ta persisti pa purba dividi nos comunidad. Nos partido ta para pa union entre cada miembro di nos comunidad. Tur persona di buena fe, capaz, y cu stima nos pais y nos pueblo, ta bonbini den nos partido sin importa su color, su religion, ni tampoco cuanto placa e por tin.

Ta precisamente e mentalidad di “nos contra nan” a contribui grandemente na e problemanan social den nos pais. Cu esaki nos kier hasi un suplica na partido MEP y su gobierno pa cuminsa traha pa union den nos comunidad y stop di crea division entre nos mes hendenan puramente pa purba saca probecho politico.

Partido Democracia Real ta sumamente feliz cu un persona honesto y patriotico manera Anna Marila a dicidi di uni cu nos partido. Durante e ultimo lunanan nos a conoce Sra. Lacle como un persona hopi dinamico y capaz cu tin un stimashon enorme pa nos pais, y muy en especial nos hubentud.

Manera nos a demonstra caba (y lo sigui demonstra), nos ta un partido cu ta prefera enfoca riba nos vision pa nos pais, y riba nos ideanan pa cu un mihor calidad di bida pa nos comunidad.

Nos ta hanja lamentabel cu partido MEP gusta desvia atencion di e temanan importante aki, y ta prefera di practica locual nos ta considera shishería. Pero na otro banda nos por compronde si pakico nan ta hasié. Cada ken ta gusta ta comfortabel.

Pa Partido Democracia Real ta mas comfortabel tocando e temanan di importancia pa futuro di nos comunidad y nos pais, mientras cu otro ta mas comfortabel ta plama redashi y ataca esnan cu no ta di acuerdo cu nan.

Partido Democracia Real lo sigui dilanti cu un campaña di nivel, y dunando bon bini na tur esnan cu realmente ta hanja cu nos comunidad merece un mihor calidad di bida.

Serge Mansur

Partido Democracia Real

“Nos por mas”?

Nos tur por corda con na luna di Maart 2004 dos minister, esta ministernan Croes y Wever a dicidi di sera porta di nan respectivo departamentonan pa Centrale Accountants Dienst (CAD). Esaki no solamente ta en contra di tur principionan di bon gobernacion y transparencia, pero ta en contra di leynan di contabilidad of otro leynan cu posiblemente por ta aplicabel.

Den un caso asina, caminda cu un of mas ministro ta tuma un decision irresponsabel, ta bira tarea di e lider di e Gobierno en cuestion pa coregi esaki. Lamentablemente, apesar di tur e protestanan encontra di e forma di actua di e dos ministronan, nos prome ministro a dicidi di hunga ciego, sordo y mudo den e caso aki.

Desde e dia cu e dos ministronan aki, cu apoyo tacito di nos Prome Ministro, a nenga di laga CAD controla nan departamentonan nos comunidad a wordo sorprendi cu:

• Un fraude enorme den Landslaboratorium.
• Sorpresa di un deficit enorme den AZV.
• Un posibel fraude grandi den Departamento di Ambulance.
• Benta di rijbewijs.
• Sorpresa di un deficit enorme den Serlimar.
• Aparente benta di permiso.

Lo no ta nada stranjo si nos ta hanja nos mes confronta cu mas sorpresa desagradabel for di e respectivo departamentonan di (entre otro) e dos ministronan aki.

Mester señala cu no tin ningun prueba di complicidad di e dos ministronan en cuestion den e casonan aki, pero e hecho cu nan a stroba e departamento encarga cu control den Gobierno di hasi su trabao ta lanta hopi pregunta. Y hasta si nan no tin ningun involvimento den e escandalonan aki, nan huicio mester wordo cuestiona seriamente. Mescos ta conta pa Prome Ministro cu a tolera e situacion aki.

E pregunta e ora ey ta cu si e decision di e ministronan aki a contribui na crea un ambiente cu a hasi posibel e ladronicia y corupcion aki. Si esey ta e caso ta surgi un di dos pregunta: Nan lo por wordo tení personalmente responsabel pa e perdidanan cu pais Aruba a sufri? Esaki ta un pregunta cu eventualmente lo mester wordo contesta pa esnan versá den e materia.

Henter e situacion aki a cuminsa ora cu CAD a purba cuminsa cu un investigacion riba nombramento di personal door e dos ministronan en cuestion. Esaki a pone nan spanta asina hopi cu nan a corre lock tur porta. Aunke cu nombramento di amigo, famia, campanjador, etc. a bira comun na Aruba, y nos comunidad ta custuma caba di tende di esaki, e ta keda algo sumamente perhudicial pa nos pais.

Ta precisamente e mal custumber aki di nombra hende a base di amistad of lealtad envez di capacidad cu ta fomenta un ambiente caminda cu disiplina ta deteriora y nos ta hanja nos mes confronta cu situacionnan manera esnan señalá.

Lamentablemente, e dos partidonan grandi, apesar di critica e practica aki for di oposicion, ta hasi nan mes culpabel di esaki ora ta den gobierno. Eynan nos ta mira claramente cu ambos partido grandi ta funciona hopi bon den oposicion, pero no mucho bon den gobernacion. Ta toca nos comunidad pa percura di laga tur dos e partidonan aki sinta den oposicion y laga energia nobo e ideanan nobo hanja e oportunidad pa drecha locual a wordo danjá na Aruba.

Partido Democracia Real ta compromete su mes di fortalece e departamentonan di control tanto paden como pafor di Gobierno. Nos partido ta mira e cuerponan aki como indispensabel pa funcionamento optimal di un democracia. Es mas, nan ta un amigo di bon gobernacion y bon gobernante, y no un enemigo. Nos ta di opinion cu un gobernante cu no tin nada di sconde no tin nodo di tene miedo di control.

A coward, a most devout coward, religious in it.

-William Shakespeare

Recientemente Democracia Real a publica e prome segmento di e serie di articulo caminda nos ta analisa e programa di gobernacion di MEP, y compara esaki cu e realidad di locual a sosode e ultimo 6 añanan.

Nos a haña hopi reaccion positivo riba esaki, como cu esaki ta un iniciativa ful nobo. Nos no ta grita of ataca hende, ni ataca nan famia. Locual nos ta hasi ta simplemente analisa si locual a wordo primintí a wordo cumplí cun’e. Obviamente, priminti algo sin cumpli ta simplemente gañamento.

Parce cu e iniciativa aki a pone algun persona den partido MEP bira masha nervioso mes. Atrobe un di e autornan cobarde y anonimo di e partido a dicidi di ataca tanto mi persona como nos partido. Pakico tanto nerviosismo? Wel, simplemente pasobra nan sa masha bon cu cualkier analisis asina lo sali pesimo pa nan.

Mescos cu miles di Arubano, mi por corda den anjanan 70 y 80 partido MEP tabata uno di hendenan cu curashi cu no tabata tin miedo pa para pa nan principionan. Ta tristo pa wak cu awor e partido ey a cay den man di un grupito di probechador cobarde cu ta ataca hende anonimamente, envez di maneha nos pais cu ta locual nos comunidad ta paga nan hopi placa pa hasi.

E atake anonimo di MEP ta cuminsa cu yama mi persona un “hende di bon bida” (como sifuera esey ta algo malo). Mi mester admiti cu mi bida en berdad ta bon; mi tin un fantastico casá, un tremendo famia, bon amigo rond di mundo, y mi ta biba riba un isla magnifico. Na otro banda, mescos cualkier hende, tin cos cu ta molestiami tambe. Por ehempel: Un Gobierno sub-mediocre cu ta devastando e pais cu mi stima.

Locual mi ta hanja hopi stranjo ta cu e partido cu ta sintá den Gobierno supuestamente pa percura pa felicidad di henter nos pueblo, aparentemente no gusta ora ciudadano Arubano tin bida bon. Acaso ta nan so mag biba bon? Ta friends & family so mag biba bon a costo di e resto di nos comunidad? Ta pesey nan a introduci un BBO, hisa invoerrechten, hisa leges, hisa accijns, etc, etc. sin cu esakinan ta den nan programa?

Wel, Democracia Real SI ta boga pa un bida digno y bon pa cada Arubano (incluyendo integrantenan di MEP, pero NO a costo di pueblo). Nos lo ta feliz envez di envidioso ora nos por mira nos conciudadanonan biba bon.

E atake anonimo di MEP na dado momento ta yama nos partido pa “Chiripero”. Mi ta supone cu e palabra “kinderachtig” aki ta referi na e hecho cu den e ultimo eleccion MEP a hanja hopi mas voto cu nos partido. Esey ta un hecho, pero e autor anomimo nervioso mester corda cu ni AVP, ni MEP no a nace grandi. Hasta PPA, e partido cu mas asiento a yega di saca den historia na Aruba a nace chikito.

E autor anonimo nervioso ta sigui menciona varios iniciativa di AVP cu cual ni mi persona, ni Democracia Real no tin nada di haber (ni nos ta di acuerdo cu nan). Mi no sa kico AVP su errornan tin di haber cu nos partido, pero mi ta supone cu esaki ta producto di e autor anonimo su nerviosismo.

Dado momento e autor anonimo nervioso ta scirbi: “Alavez tin punto di accion cu debi na cierto circumstancianan tin cu wordo ehecuta ainda”. Esaki ta berdad, pero a lubida di menciona cu e circumstancianan aki ta: Un Gobierno Sub-Mediocre. Asina cu Democracia Real drenta Gobierno e problema ey lo ta drechá, y pueblo di Aruba lo por experiencia gobernacion responsabel y capaz pa cada Arubano.

Democracia Real lo sigui analisa e promesanan di MEP y compara esakinan cu locual en realidad a wordo hasí. Lo nos hasi esaki na un forma obhetivo, y sin bira nervioso, sin sconde tras di anonimidad y sin atakenan baho y cobarde. Pasobra nos SI ta kere cu promesanan di campanja t’ey pa wordo cumplí.

Atrobe den fin di siman cu a pasa un of mas persona di partido MEP no tabatin mihor uso di nan tempo cu ataca (entre otro) mi persona cu un nota di prensa. E biaha aki aparentemente mi apoyo pa e pensionadonan di nos pais a irita nan.

Mescos cu den pasado atrobe e nota di prensa aki ta uno anonimo, confirmando pa di tantisimo biaha cu den e partido geel tin un falta grandi di curashi. Falta curashi pa tuma decisionnan necesario pa nos pais y nos comunidad, falta curashi pa baha for di Bestuurskantoor y ricibi un manifesto di e pensionadonan (aki mester elogia Sra. Wyatt-Ras cu si a mustra cara), y falta curashi pa para tras di bo palabranan. Pero ta logico cu ningun hende lo no kier para responsabel pa un articulo asina ridiculo.

E biaha aki e nota di prensa ta purba conecta mi persona (como tambe lider di AVP) cu e problemanan di Interbank y e benta di e banco na FCCA. Ta obvio for di e contenido di e articulo cu e autor no tin ningun, pero ningun idea di kico e ta papiando, y den esaki e ta mustrando e mesun mediocridad cu e partido tin seis aña ta demonstrando den Gobierno.

Pa loke ta e problemanan di Interbank mi kier bisa bon cla cu ni mi mayornan, ni mi persona, ni ningun di mi rumannan (ni ningun di nos empresanan) a yega di fia un cent preto di Interbank cu no a wordo pagá bek cabalmente cu tur su interes. Si acaso tin hende cu no a cumpli cu e banco, sea cual sea nan faam, mi no por papia pa nan, ni wordo tení responsabel pa nan actonan.

Encuanto e desaroyonan y e problemanan di e Banco y e benta na FCCA, mi no ta kere cu esaki ta e foro pa purba splica henter un proceso complica, pero si mi kier tuma e oportunidad aki pa invita e autor di e articulo of cualkier otro persona di Partido MEP pa debati e asunto aki cu mi persona publicamente pa asina e pueblo por haya e informacion corecto y completo.

Dado momento e articulo ta bisa: “Serge Mansur no tabatin ningun tiki di verguenza di cana cu e manifestantenan diabierno ultimo”. Berguenza pa cana cu nan? Claro cu no! Tin hopi hende cu cual lo mi tin berguenza pa cana, pero no e ciudadanonan aki cu simplemente ta trece nan preocupaccionnan dilanti, y no tin miedo di mustra nan cara. Mas bien mi a sinti orguyoso di nan.

Ta tristo cu un partido cu a hasi tanto pa nos pueblo, y cu tin un historia asina glorioso, awor a yega na e punto cu su integrantenan ta sinta ofende y skirbi mentira di hende mientras cu nan ta sconde tras di anonimidad. Ta con esaki por a wordo permití? Ta con e partido di Betico por a cai den man di e grupo aki? Ta tristo, pero mas tristo ainda ta cu nan ta hibando henter nos pais abou cu nan.

Cada vez cu ami (of otro persona) critica nan maneho deficiente y nan ineptitud pa goberna, nan ta purba desvia atencion door di ataca e critico. Nunca nan no ta contesta e critica y splica nan punto. Ta bon pa cada ken puntra si mes pakico esaki ta? Pakico nan no por trece sikiera un solo punto dilanti pa defende nan “maneho”? No, nan ta prefera gasta nos placa di belasting na un campaña di publicidad pa purba convence nos cu cos ta tremendo na Aruba.

Realidad: Inflacion di mas di 10%, debe nacional di mas di Awg. 2,000,000,000, criminalidad ta subiendo, educacion y salubridad publico ta deteriorando, y cos ta bon?? Señores, cos ta bon unicamente pa esnan cu ta biba den e mundo di Friends & Family, pero den e mundo di e ciudadano Arubano cos no ta bon!

Lo mi sigui trece mi ideanan, mi pensamentonan y mi criticanan dilanti sin permiti ningun persona intimidami of desviami di esey. Y lo mi sigui apoya y cana cu esnan cu cual mi ta di acuerdo sin ningun problema.

Berguenza? Berguenza ta pa cobarde.

Bon dia.

Awe mi kier a toca e relato di prensa di Banco Central di Siman pasá. Aunke mi sa cu ya caba tabatin varios comentario riba e relato aki, tog mi kier a contribui mi granito di arena na esaki. Den e rapport tin dos punto ta resalta.

Inflacion

E prome di esakinan ta e nivel di inflacion cu tini na Aruba. Na aña 2007 nos a alcanza e nivel increibel di 10.2% di inflacion.

Hopi hende lo bisa cu esey no ta di e hopi ey. Algo di un florin awor a bira 1.10. Pero si bo wak e bon, un inflacion asina ta nifica cu bo a perde mas di un salario completo durante cada aña, Un luna henter di trabao a wordo kitá for di bo.

Ora cu e discusionnan di BBO a tuma lugar, cada instancia a presenta su pronosticonan di e efectonan inflacionario di BBO. Tur tabata premira cu e efectonan lo ta basta fuerte. Esaki ta inclui Banco Central, ATIA, Kamer, Sindicatonan como tambe otro expertonan. Tur tabatin razon, menos un: Gobierno.

Atrobe Gobierno a tuma un decision encontra di tur conseho, y atrobe e decision a resulta di ta uno malo.

Mi kier ta hopi cla cu e responsabel principal di e inflacion aki no ta

• petroleo,
• comercio,
• sindicatonan,
• ami,
• abo,
• superman,
• ni e complot internacional contra MEP.

E unico responsabel pa esaki ta e decisionnan iresponsabel y inepto di nos Gobierno.

Debe nacional

E segundo punto cu ta resalta den e rapport di Banco Central ta cu nos debe nacional a surpasa dos mil miyon florin pa prome biaha den historia na September. Nos por ta sigur cu e ta basta mas halto caba awe, cinco luna despues. Durante ultimo campaña MEP a priminti “Nos por mas”. En berdad nan tabata por mas. Pero mas malo!

Despues di tanto medida y fiyamento di placa, ta kico nos a ricibi a cambio?

• Salubridad publico ta un desaster,
• Educacion ta bayendo atras rapidamente,
• Aruba ta mas sushi cu mi a yega di wak den mi bida,
• Trafico ta congestiona y insigur,
• Criminalidad ta aumentando rapidamente,
• Servicionan di Gobierno ta sigui deteriora.

E unico cos cu mi por wak a cambio ta un campaña di publicidad pa purba convence nos cu cos ta bon. E ta cordami riba e borchinan cu bo ta wak na Cuba:

Realidad ta cu “No vamos nada bien“!
E situacion tristo aki a hasi cu Gobierno no por brinda e servicionan cu nos comunidad merece, ni tampoco e inversionnan necesario. Es mas, nos posicion den reaino a debilita tanto cu nos a para bira casi un pais limosnero.

Mi a scucha e reaccion di sr. Marlon Werleman, parlamentario di partido MEP riba mi declaracionnan tocante e medidanan nobo cu a wordo aproba den parlamento.

Mi conoce sr. Werleman como un persona honesto, y mi ta convenci cu su reaccion ta refleha su opinion sincero.

Den e caso aki ta bira obvio atrobe con importante e ta pa existi un dialogo efectivo entre Gobierno/Parlamento y sector priva. Si esey a tuma lugar den e caso aki sr. Werleman y su coleganan lo a dispone di informacion corecto y completo prome cu nan a aproba (atrobe) e locual nan Minister a bisa nan pa aproba.

Door di sigui ciegamente e instruccionnan di nan Gobierno, e Parlamento aki a tuma hopi decision hopi malo pa nos pais caba. Ta vitalmente importante pa Parlamento busca informacion for di e sectornan cu ta wordo afecta door decisionnan cu nan ta tuma. Ki malo esey lo por tini? Pakico insisti cada biaha di hasi cos scondi?

Sr. Werleman a mustra (corectamente) cu den pasado cualkier negoshi tabata limita na duna donacion te na 3% di su ganashi sin paga winst belasting. Y awor esey ta bai bira Awg.10,000. Esey ta nifica cu tur compania cu ta gana (pa aña) Awg. 333,333.00 of menos lo por duna mas na instancianan caricativo of social sin paga belasting riba esaki, mientras cu empresanan mas grandi ta bai ta mas limita.

Por ehempel un banco cu ta gana Awg.6,000,000.00 antes por a duna te cu Awg.180,000.00. Awor esey a baha cu casi 95%. Unda nan ta kere cu instancianan social y/of caricativo ta bai hanja e placa aki cu nan ta perde?

Esnan cu ta activo den instancianan social, deportivo y caricativo sa masha bon cu un porcentahe masha grandi di recaudacion di fondo ta bini di empresanan mas grandi cu den hopi caso tabata duna cientos di mil florin pa aña. Esakinan ta bai baha drasticamante, poniendo na peliger hopi proyectonan masha bunita y necesario den nos pais.

E segundo factor, esta cu Gobierno lo mester aproba cada instancia, no ta un problema segun sr. Werleman. Pero atrobe aki tin un problema. E gobierno aki a tipifica su mes di tin e tendencia pa favorece su amigonan, mientras cu e ta intimida y perhudica esnan cu e no gusta. E tendencia ey no ta kita di un dia pa otro, y lo sigui perhudica nos pais te ora cu e wordo drecha pa medio di e proximo eleccion.

Por ultimo, sr. Werleman a acusa mi persona di ta practicando “Politica Barata”. Mi no sa si esey ta nifica cu sr. Werleman ta practicando “Politica Caro” of si ela realiza cu un gobierno di Democracia Real lo sali e pueblo aki HOPI menos costoso compara cu su partido y tur e gastonan di friends & family. Si ta esey e kiermen e tin su razon.

Te aki mi reaccion.

Despues di tanto aña cu politiconan ta papia di hisa edad di pensioen pa parlamentario y ministro pa e mesun nivel di e ciudadanonan di nos pais, porfin esaki a wordo aproba den parlamento recientemente.

Esaki ta un punto cu nos por kita for di nos lista pa ora cu nos drenta gobierno.

Ta na su lugar pa nos felicita sr. Lampe cu a bini cu e iniciativa aki.

Pero tambe nos kier felicita e miembronan di parlamento cu a sa di sostene e iniciativa aki. Especialmente sr. Wilson cu a hasi esaki encontra di hopi presion di su propio coleganan di partido mep.

Esaki tabata un bunita ehempel di un parlamento cu ta funciona manera mester ta.

Pero na mes momento nos ta puntra nos mes ta cu ki cara e otro miembronan di fraccion di mep lo bai enfrenta nos comunidad.

Ta kico ta pone nan pensa cu nan, cu ta wordo paga door di e comunidad aki, merece hanja nan pensioen 15 aña prome cu e propio cuidadano cu ta pagando no solamente e salario di e parlamentario, pero tambe su pensioen!

E ta indicativo di e prioridadnan bruha di algun politico.

Nos a compronde cu siman pasa, pa sigui cu nan tradicion di e ultimo añanan, gobierno a bini cu un otro iniciativa di ley cu tin como meta permiti gobierno hinca su man mas hundo ainda den saco di ciudadano di nos pais.

Mescos cu den añanan anterior cu bbo, nfr, fringe-benefit regeling, etc. E ley aki a wordo prepara y pasa na un forma scondi.

Pero e biaha aki no ta toca solamente e saco di e ciudadano, pero tambe nos instancianan social y caricativo.

E ley en cuestion tin algun aspecto cu ta preocupa nos masha hopi mes

E prome di esakinan ta cu desde januari 2008 siad, of cualkier persona cu nan apodera tin e derecho di drenta bo cas pa busca informacion sin cu bo por stop nan y sin cu nan mester busca aprobacion di por ehempel un huez.

Ni polis no tin tanto poder!

Ni esnan cu t’ey pa proteha nos propiedad y nos bida ta haña di e gobierno aki e hermentnan necesario pa nan hasi nan trabao!

Den nan desesperacion pa placa, nan ta pasa yen di ley pa ranca placa for di nos saco, pero seguridad di pueblo aparentemente no ta mes un importante.

Esaki ta tipico di e prioridadnan bruha di e gobierno aki. Ta realmente manera cu nan ta biba riba algun otro planeta caminda cu tur cos ta bunita basta cu nan apodera di delaster un cen preto cu nan ta wak.

E segundo punto cu ta yama nos atencion ta cu e mesun gobierno aki cu tin añanan caba ta cortando subsidio di instancianan caricativo y social, y cu te hasta ta hiba nan corte si nan no paga arubus, awor ta bai stroba comercio di hasi donacion na e instancianan aki.

E ley nobo aki ta limita donacion na e instancianan aki na awg.10,000 pa aña pa cada negoshi. Tin hopi negoshi cu ta duna hopi, pero hopi mas cu esey. Pero si bo duna mas bo ta wordo cobra belasting riba esaki.

Es mas, solamente e organizacionnan cu ta cai na agrado di gobierno ta bini na remarke pa ricibi donacion. Esaki, na nos parecer, ta peligrosisimo bao un gobierno cu ta tipifica su mes cu favoritismo na un banda y persecucion na e otro.

Con por ta posibel cu tur e problemanan social cu gobierno mes a yuda fomenta, cu tur e trabaonan importante cu e instancianan aki ta hasi, awor gobierno ta bai straf esnan cu si kier yuda e organizacionnan aki hasi nan trabao.

E instancianan arubabano cu ta bai wordo castiga pa gobierno ta yenando un buraco importante den nos sociedad. Un buraco cu gobierno no por yena. Sigur no e gobierno aki!

Pa ilustra, nos por corda con poco aña atras kiwanis palm beach a hasi un recuadacion pa cumpra bullet proof vest pa polis. E tipo di iniciativa aki awor ta bai wordo stroba apesar cu gobierno no ta cumpliendo cu su responsabilidad den e area aki.

Un otro ehempel ta e bunita proyecto cu ta ofrece desayuno na muchanan di famianan menos afortuna tur dia cu tin school.

Asina tin hopi proyecto rond di aruba cu lo wordo afecta door di un decision di un gobierno desespera pa placa

Tin hopi mas ehempel con personanan menos afortuna, deportista, esnan di menos recurso, etc. Ta wordo yuda door di e instancianan aki. Awor esey ta bai wordo stroba door di e propio gobierno cu itn e responsabilidad di yuda esakinan

Bergonzoso!

Durante e ultimo añanan nos a tende nos gobernantenan papia hopi di “Fair Share”, usando e palabra ey pa hustifica ranca cada dia mas placa for di nos comunidad. Claro, ora nan bini cu medida nan ta purba pint’e bunita, y nan ta purba convence nos cu e medida en cuestion lo no pisa riba esnan di entrada mas abao.

Obviamente e ponencia aki ta uno ridiculo, como cu ta bon conocí cu medida asina lo semper dal esnan di menos recurso den cualkier comunidad. Ora cu esaki a sosode den e caso di BBO, esnan cu ta sostene e Gobierno, como tambe e propio Gobierno, ta purba culpa comerciante di e inflacion cu nan decision di introduci BBO a causa, apesar cu ta e propio comercio a protesta ferventemente contra introduccion di e medida aki.

Si nos bai bek djis algun aña pa mira e desaroyo di e entradanan di Gobierno di Aruba, nos ta mira cu na 1997 Gobierno su entrada tabata alrededor di 670 miyon florin. Na aña 2001 esaki a subi te na 840 miyon florin, y na 2006 e locual nos comunidad a contribui na Gobierno a bira mas cu 980 Miyon florin. Y esaki ta prome cu a introduci BBO!!

Si bo wak e aumento di entrada ey lo bo pansa cu Gobierno su deficit mester a desaparece, of por lo menos bira menos. Alcontrario, ta mas debe so nos pais a logra acumula den e periodo aki.

Ta con esaki ta posibel?

Ta con un Gobierno cu ta ranca tanto placa for di e ciudadanonan di su pais por crea mas y mas debe na mesun momento??

Segun Gobierno, esaki ta pasobra e no ta ricibiendo su asina yamá “Fair Share”. Pa por hustifica nan ponencia nan tin varios aña caba ta mustra riba nos GDP, esta e balor di e productonan y servicionan cu nos economia ta produci. Segun nos mandatarionan, e GDP aki ta hopi halto locual ta nifica cu Gobierno mester hanja mas placa.

Awor, algun dia pasá, nos Prome Ministro a bisa publicamente cu e GDP real di Aruba no ta mes halto cu e ta wordo raporta, cu e ta hopi mas abao, y cu pesey Aruba merece ricibi ayudo di Hulanda y/of Union Europeo.

Awor si ta bon! Dus ora Gobierno kier un GDP halto pa hustifica ranca mas placa for di comunidad e ta bon, pero ora cu ta cumbini pa e ta mas abao pa por roga pa placa for di exterior, e ora si GDP mester ta mas abao. Nos ta kere cu nos mag di spera mas seriedad y mas profesionalismo for di nos mandatarionan.

E aña aki, pa prome biaha den historia, nos Gobierno ta bai ranca mas di mil miyon florin for di e cartera di e ciudadanonan di nos isla. Na mesun momento, envez di ta den un situacion financiero solido, nos ta pidi limosna for di Hulanda, nos ta roga Valero pa regala nos ambulance, y nos ta keda sin paga e fondo di pensioen.

Pakico si tin placa anto? Entre otro pa un campaña di publicidad pa purba convence nos pueblo cu tur cos ta tremendo.

Ta tristo cu un Gobierno di un pais ta sinti cu e mester pone comercial di television pa purba convence su comunidad cu “cos ta bon”. Si en berdad cos tabata bon, lo nos tur por a sinti esey, y wak esey sin ayudo di un campaña di publicidad.

Ta tristo tambe cu e mal maneho di e recursonan di e pais aki a converti nos Gobierno den uno limosnero te na e punto cu e ta dispuesto pa perhudica e pueblonan di nos hermana islanan basta cu e haña mas placa.

Pero locual ta mas tristo ainda ta cu despues di 18 aña di gobernacion mediocre, hopi hende na nos pais a cuminsa kere cu ta esey so tin pa nos, cu no por mihor.

Nos di Partido Democracia Real t’aki pa bisa y mustra cu no ta esey so tin. Por hopi mihor!

Ta ampliamente conoci cu for di basta tempo caba servicionan di Gobierno ta bayendo atras, mientras cu cada dia nos comunidad ta wordo pidi pa paga mas y mas belasting. Na nos parecer tin un deterioro significante di e valor cu nos ta ricibi a cambio di e placa cu nos ta contribui na nos aparato gubernamental.

E causa di esaki ta uno relativamente obvio: E prioridadnan di esnan cu a maneha nos pais pa e ultimo 18 añanan tabata y ta sigui completamente bruha. Caminda antes e oportunidad pa goberna tabata un manera pa por alcanza e meta di traha na beneficio di e pais, awor a para bira cu e meta ta simplemente pa goberna. E meta di sirbi nos pais a wordo lubida, y ta biba solamente den palabra bunita, envez di den e corazon di nos gobernantenan.

E desesperacion pa, a todo costo, keda sinta riba stoel pa por sigui cumpli cu sponsor, famia y compinchi a hasi cu ta uza e recursonan di nos comunidad pa e finnan aki, envez di na beneficio di comunidad.

Recientemente a wordo publica un rapport cu Minister Wever a pidi pa wordo traha. E rapport aki aparentemente ta confirma locual tur persona e instancia independiente ta bin ta bisando, esta cu no tin un maneho coherente bao di e Gabinete Oduber.

E rapport aki, cu ta toca e funcionamento (of e falta di funcionamento) di nos asina-yama sirbidornan publico mester wordo hasi publico pa asina e pueblo votador por huzga e trabao di esnan cu e ta paga sumanan astronomico pa supuestamente sirbi su interes. Mescos ta e caso tambe cu cualkier otro rapport cu ta toca temanan similar of di interes general.

E rapport ta menciona departamento cu no tin ni derecho di existencia, y tambe departamentonan cu ta hasi trabao dobel y cu te hasta ta traha den conflicto cu otro departamento.

Nos sa cu esakinan no ta noticianan nobo, pero ta yamativo si cu un comision institui pa e propio gobierno ta trece esakinan dilanti 6 aña despues cu e hendenan aki a asumi poder. E ora bo ta puntra bo mes, ta cuanto aña bo mester pa por hasi bo trabao? Pio ainda, ta obvio cu nos ta bayendo den direccion robez.

Mi no ta kere cu ningun hende no por tin duda mas, e partido aki, cu a hanja dos oportunidad unico di e pueblo aki di por goberna sin excusa di zapato biew of postema a faya nos tur barbaramente. Nos pais ta den un pio estado cu nunca, nos comunidad ta wordo sangrá sin misericordia, y nos ta hanja nada a cambio.

Nos no por sigui hasi e mesun foutnan, tuma e mesun decisionnan. A bira tempo pa bini cu ideanan nobo y cu energia nobo.

A bira tempo pa nos gobernacion sigui e resto di nos pais y drenta siglo 21 pa caba.