Serge Mansur

 

 Awe mi kier a toca dos tema cu Partido Democracia Real ta considera di hopi importancia.

 

E prome di esakinan ta e presupuesto nacional pa 2009 cu e anja aki a wordo entrega na Parlamento na tempo. Un logro cu sigur merece elogio.

 

E presupuesto di 2009 contrario na e asina-yama “Oduber-Swaen norm” ainda ta premira un deficit financiero significante di mas di 30 miyon florin compara cu alrededor di 50 miyon na 2008. Ta berdad cu e deficit aki ta mas chikito cu den anjanan anterior, pero e preguntanan clave ta si e presupuesto ta sano, y si e ta realistico.

 

E puntonan cu a yama Democracia Real su atencion inmediatamente ta cu e inversion di parti di Gobierno a wordo corta masha hopi mes. Di 31 miyon na 2007 pa 25 miyon e anja aki te na 15 miyon otro anja. Na mes momento gastonan di personal di Gobierno ta sigui mustra un tendencia creciente, mientras cu nos pais su gastonan di interes riba nos debe ta creciendo rapidamente.

 

Na 2009 ta wordo premira cu nos gastonan na interes lo bai ta alrededor di 130 miyon florin. Esaki ta nifica cu e malgastamento di placa di e ultimo 20 anjanan ta costando nos pueblo mas di 350 mil florin tur dia na interes. Esaki ta inclui diadomingo y dianan liber. Anto corda bon: Esaki no ta pagamento di e debe, sino interes so!

 

Un otro punto cu ta resalta ta cu Gobierno ta spera di hanja un entrada extra di 20 miyon florin di “verkoop on. roerende goederen en grond”. Traducí na papiamento esaki  kiermen benta di bestuurscollege. Cu otro palabra, e deficit financiero structural di gobierno ta creciendo ainda! Si no bende e edificio aki, e deficit lo surpasa 50 miyon florin.

 

Dus si nos mira e presupuesto den su totalidad, nos por conclui cu e gastonan ta sigui subi, y cu inversionnan necesario ta bahando, mientras cu e deficit operacional di Gobierno ta birando pió.

 

Nos mester djis para keto un rato y realiza cu nos Gobierno su inversionnan den nos pais ta 15 miyon, mientras cu su gastonan di interes na instancianan financiero, tanto local como internacional ta casi 10 biaha mas hopi cu esey.

 

Ta pesey nos ta paga belasting? Pa nos ricibi un florin di inversion den nos pais pa cada 9 florin cu nos tin di paga na interes? Senjores, esaki ta muestra di un ineptitud total combina cu falta di sinceridad.

 

Pero lo mas preocupante ta cu ta dudoso cu nos ta bai logra e entradanan cu a wordo presupuesta. Cifranan preliminar di turismo pa resto di e anja aki y otro anja ta espantoso, y mirando desaroyonan mundial tin un bon chance cu 2009 ta bai ta un anja hopi dificil pa tur hende. Dus nos ta duda cu Gobierno ta bai logra cumpli cu e presupuesto manera ela wordo entrega na parlamento.

 

E di dos punto ta relaciona cu e mesun tema aki, y esaki ta e suma cuantioso cu Gobierno di Aruba ta bai ricibi di Hulanda. Ta trata aki di e placa cu a wordo genera cu e benta di e propiedad caminda Marriott Hotel ta situa.

 

Democracia Real a tuma nota di e declaracionnan di Premier Oduber pa loke ta trata e uso di e fondonan aki, y aki mester bisa cu den lineanan grandi nos ta di acuerdo cu e intencionnan di Gobierno pa loke ta trata e uso di e fondonan aki.

 

Tanto mudamento di haf como bahamento di nos debe nacional ta en berdad beneficioso pa nos comunidad.

 

Pero adicionalmente nos lo kier mira tambe pa Gobierno aumenta e inversion den publicidad den exterior pa un tempo limita pa por purba minimiza e efectonan negativo cu economia mundial lo por tin riba nos pais. Esaki no mester encera tuma mas hende na trabou, pero simplemente inverti mas den publicidad. Nos ta sigur cu ATA lo por aloca e fondonan aki na un forma efectivo na beneficio di nos pais.

 

Tambe nos ta mira un necedidad enorme den educacion. Mester di mihor mantencion di edifionan, compra di material, como tambe preparacion di docentenan. Esakinan ta inversion cu sigur lo paga nan mes bek y lo beneficia nos comunidad enormemente.

 

Ademas, nos ta kere cu ta importnate pa Gobierno inverti den fuentenan alternativo di energia. Riba e tereno aki nada no ta pasando. Nos por a scucha un plan di gas for di Colombia, pero esey a resulta di ta ca’i loco.

 

Pa finaliza; nos kier corda Gobierno cu aki ta trata di un caso cu lo no ripiti, y pesey ta vitalmente importante pa eherce disciplina y usa e fondonan aki lo mas productivo posibel.

 

 

 

Serge Mansur

Partido Democracia Real