Press Release – Monopolio bancario
Directiva di ATIA a tuma nota di algun declaracion di parti di Prome Minister di nos pais tocante e supuesto monopolio di banco cu lo tin na Aruba, y su deseo di apodera Minister di Finanzas pa permiti mas banco establece na Aruba.
Na Aruba awe tin cuatro banco cu ta operando, locual ta dos menos di locual tabata tin pa hopi aña. ATIA ta un organizacion cu ta kere ferventemente den competencia, y nos opinion ta cu ta bon posibel cu mas banco na Aruba lo por ta positivo tanto pa nos economia como pa nos comunidad. Pero nos ta di opinion cu e decision ey mester wordo lagá na nos Banco Central, un instancia cu pa binti aña ta bin ta hiba un maneho hopi profesional, y no den man di un of mas politico cu pa 6 aña largo a hiba un maneho algo menos profesional.
Nos mester tene na cuenta cu e industria bancario ta uno di suma importancia y alavez hopi sensitivo como cu aki ta trata na instancianan cu ta maneha e placa cu miles di Arubano a deposita serca nan. Esaki ta hasi nan diferente di tur otro empresa cu ta hasi negoshi cu nan mesun capital. E responsabilidad cu un banco tin na su clientela ta enorme! Ta pesey nos mester tin masha ciudao mes prome cu nos permiti algun politico mete den e industria ey.
E berdad ta cu na un isla chikito manera Aruba cuatro banco no ta constitui un monopolio. Locual si ta monopolio ta:
- UN solo empresa di Cable TV,
- UN solo empresa cu ta brinda servicio di Internet,
- UN solo empresa cu por bende corriente,
- UN solo empresa cu por bende awa,
Ta ironico cu e propio Prome Minister aki a bring alma y cuerpo pa mantene e monopolio di Setar pa cu servicio di celular, mientras cu awor e ta contra di monopolio. Ta ironico cu e propio Prome Minister aki a insisti pa cumpra Cable TV pa mantene e monopolio di Internet Service siendo cu awor e ta contra monopolio. Ta ironico cu ta e propio Prome Minister aki ta defende y proteha monopolio ora cu e ta den su man, mientras cu e ta contra esaki ora cu e no tin control di e (supuesto) monopolio.
Ta importante pa nos corda cu e berdero monopolionan na Aruba ta brinda servicio y productonan cu cada Arubano ta forza pa cumpra, mientras cu esaki no ta e caso cu banco. Tambe ta notorio cu den prensa diariamente nos por scucha of lesa ciudadano ta keha di prijs di awa, corriente y comunicacion (monopolio di Gobierno), mientras cu esaki no ta e caso cu e sector bancario.
E ehempel di Luxemburg ta uno incorecto. Nos industria bancario ta ofrece su servicionan na nos propio poblacion, mientras cu na Luxemburg esaki no ta e caso. Si Premier Oduber ta kere cu e banconan na Luxemburg ta floreciendo danki na e 300,000 hende cu ela menciona e ta bon bruhá. Si nos kier compara nos mes cu otro pais nos por compara nos mes cu Antiyas of Barbados.
ATIA ta pensa cu nos Gobierno no mester mete den un industria asina delicado, pero laga esaki na personanan capaz manera e profesionalnan di Banco Central.
Gobierno tin cu enfoca riba mehora e funcionamento y e eficiencia di nos aparato publico envez di bai stroba e funcionamento eficiente di nos sector bancario.
Loading ...