Serge Mansur

“Nos por mas”?

Nos tur por corda con na luna di Maart 2004 dos minister, esta ministernan Croes y Wever a dicidi di sera porta di nan respectivo departamentonan pa Centrale Accountants Dienst (CAD). Esaki no solamente ta en contra di tur principionan di bon gobernacion y transparencia, pero ta en contra di leynan di contabilidad of otro leynan cu posiblemente por ta aplicabel.

Den un caso asina, caminda cu un of mas ministro ta tuma un decision irresponsabel, ta bira tarea di e lider di e Gobierno en cuestion pa coregi esaki. Lamentablemente, apesar di tur e protestanan encontra di e forma di actua di e dos ministronan, nos prome ministro a dicidi di hunga ciego, sordo y mudo den e caso aki.

Desde e dia cu e dos ministronan aki, cu apoyo tacito di nos Prome Ministro, a nenga di laga CAD controla nan departamentonan nos comunidad a wordo sorprendi cu:

• Un fraude enorme den Landslaboratorium.
• Sorpresa di un deficit enorme den AZV.
• Un posibel fraude grandi den Departamento di Ambulance.
• Benta di rijbewijs.
• Sorpresa di un deficit enorme den Serlimar.
• Aparente benta di permiso.

Lo no ta nada stranjo si nos ta hanja nos mes confronta cu mas sorpresa desagradabel for di e respectivo departamentonan di (entre otro) e dos ministronan aki.

Mester señala cu no tin ningun prueba di complicidad di e dos ministronan en cuestion den e casonan aki, pero e hecho cu nan a stroba e departamento encarga cu control den Gobierno di hasi su trabao ta lanta hopi pregunta. Y hasta si nan no tin ningun involvimento den e escandalonan aki, nan huicio mester wordo cuestiona seriamente. Mescos ta conta pa Prome Ministro cu a tolera e situacion aki.

E pregunta e ora ey ta cu si e decision di e ministronan aki a contribui na crea un ambiente cu a hasi posibel e ladronicia y corupcion aki. Si esey ta e caso ta surgi un di dos pregunta: Nan lo por wordo tení personalmente responsabel pa e perdidanan cu pais Aruba a sufri? Esaki ta un pregunta cu eventualmente lo mester wordo contesta pa esnan versá den e materia.

Henter e situacion aki a cuminsa ora cu CAD a purba cuminsa cu un investigacion riba nombramento di personal door e dos ministronan en cuestion. Esaki a pone nan spanta asina hopi cu nan a corre lock tur porta. Aunke cu nombramento di amigo, famia, campanjador, etc. a bira comun na Aruba, y nos comunidad ta custuma caba di tende di esaki, e ta keda algo sumamente perhudicial pa nos pais.

Ta precisamente e mal custumber aki di nombra hende a base di amistad of lealtad envez di capacidad cu ta fomenta un ambiente caminda cu disiplina ta deteriora y nos ta hanja nos mes confronta cu situacionnan manera esnan señalá.

Lamentablemente, e dos partidonan grandi, apesar di critica e practica aki for di oposicion, ta hasi nan mes culpabel di esaki ora ta den gobierno. Eynan nos ta mira claramente cu ambos partido grandi ta funciona hopi bon den oposicion, pero no mucho bon den gobernacion. Ta toca nos comunidad pa percura di laga tur dos e partidonan aki sinta den oposicion y laga energia nobo e ideanan nobo hanja e oportunidad pa drecha locual a wordo danjá na Aruba.

Partido Democracia Real ta compromete su mes di fortalece e departamentonan di control tanto paden como pafor di Gobierno. Nos partido ta mira e cuerponan aki como indispensabel pa funcionamento optimal di un democracia. Es mas, nan ta un amigo di bon gobernacion y bon gobernante, y no un enemigo. Nos ta di opinion cu un gobernante cu no tin nada di sconde no tin nodo di tene miedo di control.