Serge Mansur

Atrobe den fin di siman cu a pasa un of mas persona di partido MEP no tabatin mihor uso di nan tempo cu ataca (entre otro) mi persona cu un nota di prensa. E biaha aki aparentemente mi apoyo pa e pensionadonan di nos pais a irita nan.

Mescos cu den pasado atrobe e nota di prensa aki ta uno anonimo, confirmando pa di tantisimo biaha cu den e partido geel tin un falta grandi di curashi. Falta curashi pa tuma decisionnan necesario pa nos pais y nos comunidad, falta curashi pa baha for di Bestuurskantoor y ricibi un manifesto di e pensionadonan (aki mester elogia Sra. Wyatt-Ras cu si a mustra cara), y falta curashi pa para tras di bo palabranan. Pero ta logico cu ningun hende lo no kier para responsabel pa un articulo asina ridiculo.

E biaha aki e nota di prensa ta purba conecta mi persona (como tambe lider di AVP) cu e problemanan di Interbank y e benta di e banco na FCCA. Ta obvio for di e contenido di e articulo cu e autor no tin ningun, pero ningun idea di kico e ta papiando, y den esaki e ta mustrando e mesun mediocridad cu e partido tin seis aña ta demonstrando den Gobierno.

Pa loke ta e problemanan di Interbank mi kier bisa bon cla cu ni mi mayornan, ni mi persona, ni ningun di mi rumannan (ni ningun di nos empresanan) a yega di fia un cent preto di Interbank cu no a wordo pagá bek cabalmente cu tur su interes. Si acaso tin hende cu no a cumpli cu e banco, sea cual sea nan faam, mi no por papia pa nan, ni wordo tení responsabel pa nan actonan.

Encuanto e desaroyonan y e problemanan di e Banco y e benta na FCCA, mi no ta kere cu esaki ta e foro pa purba splica henter un proceso complica, pero si mi kier tuma e oportunidad aki pa invita e autor di e articulo of cualkier otro persona di Partido MEP pa debati e asunto aki cu mi persona publicamente pa asina e pueblo por haya e informacion corecto y completo.

Dado momento e articulo ta bisa: “Serge Mansur no tabatin ningun tiki di verguenza di cana cu e manifestantenan diabierno ultimo”. Berguenza pa cana cu nan? Claro cu no! Tin hopi hende cu cual lo mi tin berguenza pa cana, pero no e ciudadanonan aki cu simplemente ta trece nan preocupaccionnan dilanti, y no tin miedo di mustra nan cara. Mas bien mi a sinti orguyoso di nan.

Ta tristo cu un partido cu a hasi tanto pa nos pueblo, y cu tin un historia asina glorioso, awor a yega na e punto cu su integrantenan ta sinta ofende y skirbi mentira di hende mientras cu nan ta sconde tras di anonimidad. Ta con esaki por a wordo permití? Ta con e partido di Betico por a cai den man di e grupo aki? Ta tristo, pero mas tristo ainda ta cu nan ta hibando henter nos pais abou cu nan.

Cada vez cu ami (of otro persona) critica nan maneho deficiente y nan ineptitud pa goberna, nan ta purba desvia atencion door di ataca e critico. Nunca nan no ta contesta e critica y splica nan punto. Ta bon pa cada ken puntra si mes pakico esaki ta? Pakico nan no por trece sikiera un solo punto dilanti pa defende nan “maneho”? No, nan ta prefera gasta nos placa di belasting na un campaña di publicidad pa purba convence nos cu cos ta tremendo na Aruba.

Realidad: Inflacion di mas di 10%, debe nacional di mas di Awg. 2,000,000,000, criminalidad ta subiendo, educacion y salubridad publico ta deteriorando, y cos ta bon?? Señores, cos ta bon unicamente pa esnan cu ta biba den e mundo di Friends & Family, pero den e mundo di e ciudadano Arubano cos no ta bon!

Lo mi sigui trece mi ideanan, mi pensamentonan y mi criticanan dilanti sin permiti ningun persona intimidami of desviami di esey. Y lo mi sigui apoya y cana cu esnan cu cual mi ta di acuerdo sin ningun problema.

Berguenza? Berguenza ta pa cobarde.

This entry was posted on Sunday, February 17th, 2008 at 1:13 pm and is filed under Relatonan di Prensa. You can follow any responses to this entry through the RSS 2.0 feed. You can leave a response, or trackback from your own site.