Serge Mansur

Durante e ultimo añanan nos a tende nos gobernantenan papia hopi di “Fair Share”, usando e palabra ey pa hustifica ranca cada dia mas placa for di nos comunidad. Claro, ora nan bini cu medida nan ta purba pint’e bunita, y nan ta purba convence nos cu e medida en cuestion lo no pisa riba esnan di entrada mas abao.

Obviamente e ponencia aki ta uno ridiculo, como cu ta bon conocí cu medida asina lo semper dal esnan di menos recurso den cualkier comunidad. Ora cu esaki a sosode den e caso di BBO, esnan cu ta sostene e Gobierno, como tambe e propio Gobierno, ta purba culpa comerciante di e inflacion cu nan decision di introduci BBO a causa, apesar cu ta e propio comercio a protesta ferventemente contra introduccion di e medida aki.

Si nos bai bek djis algun aña pa mira e desaroyo di e entradanan di Gobierno di Aruba, nos ta mira cu na 1997 Gobierno su entrada tabata alrededor di 670 miyon florin. Na aña 2001 esaki a subi te na 840 miyon florin, y na 2006 e locual nos comunidad a contribui na Gobierno a bira mas cu 980 Miyon florin. Y esaki ta prome cu a introduci BBO!!

Si bo wak e aumento di entrada ey lo bo pansa cu Gobierno su deficit mester a desaparece, of por lo menos bira menos. Alcontrario, ta mas debe so nos pais a logra acumula den e periodo aki.

Ta con esaki ta posibel?

Ta con un Gobierno cu ta ranca tanto placa for di e ciudadanonan di su pais por crea mas y mas debe na mesun momento??

Segun Gobierno, esaki ta pasobra e no ta ricibiendo su asina yamá “Fair Share”. Pa por hustifica nan ponencia nan tin varios aña caba ta mustra riba nos GDP, esta e balor di e productonan y servicionan cu nos economia ta produci. Segun nos mandatarionan, e GDP aki ta hopi halto locual ta nifica cu Gobierno mester hanja mas placa.

Awor, algun dia pasá, nos Prome Ministro a bisa publicamente cu e GDP real di Aruba no ta mes halto cu e ta wordo raporta, cu e ta hopi mas abao, y cu pesey Aruba merece ricibi ayudo di Hulanda y/of Union Europeo.

Awor si ta bon! Dus ora Gobierno kier un GDP halto pa hustifica ranca mas placa for di comunidad e ta bon, pero ora cu ta cumbini pa e ta mas abao pa por roga pa placa for di exterior, e ora si GDP mester ta mas abao. Nos ta kere cu nos mag di spera mas seriedad y mas profesionalismo for di nos mandatarionan.

E aña aki, pa prome biaha den historia, nos Gobierno ta bai ranca mas di mil miyon florin for di e cartera di e ciudadanonan di nos isla. Na mesun momento, envez di ta den un situacion financiero solido, nos ta pidi limosna for di Hulanda, nos ta roga Valero pa regala nos ambulance, y nos ta keda sin paga e fondo di pensioen.

Pakico si tin placa anto? Entre otro pa un campaña di publicidad pa purba convence nos pueblo cu tur cos ta tremendo.

Ta tristo cu un Gobierno di un pais ta sinti cu e mester pone comercial di television pa purba convence su comunidad cu “cos ta bon”. Si en berdad cos tabata bon, lo nos tur por a sinti esey, y wak esey sin ayudo di un campaña di publicidad.

Ta tristo tambe cu e mal maneho di e recursonan di e pais aki a converti nos Gobierno den uno limosnero te na e punto cu e ta dispuesto pa perhudica e pueblonan di nos hermana islanan basta cu e haña mas placa.

Pero locual ta mas tristo ainda ta cu despues di 18 aña di gobernacion mediocre, hopi hende na nos pais a cuminsa kere cu ta esey so tin pa nos, cu no por mihor.

Nos di Partido Democracia Real t’aki pa bisa y mustra cu no ta esey so tin. Por hopi mihor!

This entry was posted on Thursday, November 15th, 2007 at 12:00 pm and is filed under Relatonan di Prensa. You can follow any responses to this entry through the RSS 2.0 feed. You can leave a response, or trackback from your own site.