Serge Mansur

Ta ampliamente conoci cu for di basta tempo caba servicionan di Gobierno ta bayendo atras, mientras cu cada dia nos comunidad ta wordo pidi pa paga mas y mas belasting. Na nos parecer tin un deterioro significante di e valor cu nos ta ricibi a cambio di e placa cu nos ta contribui na nos aparato gubernamental.

E causa di esaki ta uno relativamente obvio: E prioridadnan di esnan cu a maneha nos pais pa e ultimo 18 añanan tabata y ta sigui completamente bruha. Caminda antes e oportunidad pa goberna tabata un manera pa por alcanza e meta di traha na beneficio di e pais, awor a para bira cu e meta ta simplemente pa goberna. E meta di sirbi nos pais a wordo lubida, y ta biba solamente den palabra bunita, envez di den e corazon di nos gobernantenan.

E desesperacion pa, a todo costo, keda sinta riba stoel pa por sigui cumpli cu sponsor, famia y compinchi a hasi cu ta uza e recursonan di nos comunidad pa e finnan aki, envez di na beneficio di comunidad.

Recientemente a wordo publica un rapport cu Minister Wever a pidi pa wordo traha. E rapport aki aparentemente ta confirma locual tur persona e instancia independiente ta bin ta bisando, esta cu no tin un maneho coherente bao di e Gabinete Oduber.

E rapport aki, cu ta toca e funcionamento (of e falta di funcionamento) di nos asina-yama sirbidornan publico mester wordo hasi publico pa asina e pueblo votador por huzga e trabao di esnan cu e ta paga sumanan astronomico pa supuestamente sirbi su interes. Mescos ta e caso tambe cu cualkier otro rapport cu ta toca temanan similar of di interes general.

E rapport ta menciona departamento cu no tin ni derecho di existencia, y tambe departamentonan cu ta hasi trabao dobel y cu te hasta ta traha den conflicto cu otro departamento.

Nos sa cu esakinan no ta noticianan nobo, pero ta yamativo si cu un comision institui pa e propio gobierno ta trece esakinan dilanti 6 aña despues cu e hendenan aki a asumi poder. E ora bo ta puntra bo mes, ta cuanto aña bo mester pa por hasi bo trabao? Pio ainda, ta obvio cu nos ta bayendo den direccion robez.

Mi no ta kere cu ningun hende no por tin duda mas, e partido aki, cu a hanja dos oportunidad unico di e pueblo aki di por goberna sin excusa di zapato biew of postema a faya nos tur barbaramente. Nos pais ta den un pio estado cu nunca, nos comunidad ta wordo sangrá sin misericordia, y nos ta hanja nada a cambio.

Nos no por sigui hasi e mesun foutnan, tuma e mesun decisionnan. A bira tempo pa bini cu ideanan nobo y cu energia nobo.

A bira tempo pa nos gobernacion sigui e resto di nos pais y drenta siglo 21 pa caba.