Serge Mansur

Relato di Prensa

ATIA

Juli 5, 2007

Directiva di ATIA a tuma nota di e desaroyonan relaciona cu e conflicto laboral entre Valero y su trahadornan na aeropuerto.

ATIA, mescos cu den pasado, ta reconoce e derecho di cada organizacion di uza e tacticanan na su disposicion pa trece su punto dilanti (naturalmente dentro di ley). Den caso di un sindicato, esaki ta inclui e derecho di welga ora cu esey ta necesario.

Den e caso especifico aki ATIA tin dos preocupacion serio pa cu e accionnan di parti di e trahadornan.

Na prome lugar nos ta considera  cu ta preocupante cu, pa motivo cu nos Gobierno a introduci un serie di medida, e sindicatonan ta purba di pone comercio paga pa esaki. E tempo pa actua tabata mas bien ora cu tur instancia independiente na Aruba a avisa di e peligernan representa pa tur e medidanan cu Gobierno a introduci.

Na varios ocacion nos a scucha lidernan sindical expresa cu nan tin pensa di tuma posicion fuerte contra comercio pa wordo compensa pa e efecto di e medidanan. Nos ta considera esaki un situacion peligroso, pasobra historia ta mustra cu situacionnan asina ta crea un spiral inflacionario adicional.

E segundo punto di preocupacion ta cu e accion di e sindicato no ta parce di ta dirigi contra e empresa Valero, pero mas bien contra di e pueblo di Aruba. E efecto di e welga aki lo tin consecuencia negativo pa e aerolineanan, nos aeropuerto, y nos industria turistico, mientras cu su efecto contra Valero ta minimo.

Nos ta puntra nos mes si un sindicato lo mester shantagia henter nos comunidad pa beneficio material di 15 persona. Naturalmente e interes di e personanan aki ta conta! Pero no mas cu e otro 100,000+ persona riba e pais aki.

Ta parce nos cu mester tin otro manera pa yega na un acuerdo cu Valero cu no ta inclui hasi danjo na e principal industria di nos isla.