Serge Mansur

Fair Share

For di dia cu Gabinete Oduber III a sinta, a cuminsa scucha e frase “Fair Share”. Cu esaki Gobierno ta purba ilustra cu e entradanan di Gobierno, como porcentahe di GDP di nos pais, no ta suficiente. GDP ta basicamente e valor di tur producto y servicio cu ta wordo bendí na Aruba durante un aña. GDP ta wordo usa rond mundo pa midi productividad economico di un pueblo durante un aña, y tambe pa compara un aña cu otro pa midi crecimento economico.

E ponencia di Gobierno ta cu e parti cu ta toca Gobierno mester ta rond di 25%, y según nan e ta rond di 20%. Nan ta uza e cifranan pa insinua cu sector priva no ta contribuyendo suficiente na nos sector publico (Gobierno).

For di dia cu Gobierno a bini cu e ponencia aki, directiva di ATIA ta treciendo dilanti cu nos no ta di acuerdo cu e ponencianan aki, como cu Gobierno nunca a mustra cu cifra cu locual nan ta alegando ta verdad. Es mas, cifranan imparcial ta mustra lo contrario.

ATIA ta opina cu e ponencia aki ta mas bien un intento pa desvia atencion di e problema real di Gobierno, esta su mal custumber di gasta placa na un forma irresponsabel. Esaki ta un hecho cu a wordo treci dilanti door di un cantidad di instancia tanto local como internacional cu unanimamente ta opina cu gobierno mester reduci su gastonan pa por sirbi e comunidad aki corectamente. E instancianan aki ta organizacionnan serio y profesional cu no tin ningun motivo di inventa storia.

Pa loke ta trata e cifranan real di e entradanan cu Gobierno ta sacando for di saco di e comunidad Arubano, ta asina cu según cifranan di Centraal Bureau Statistiek, na 2003 (e ultimo aña pa cual nos ta dispone di cifra) Gobierno a ricibi un total di 35.0% di GDP di Aruba. E cifra aki ta inclui 715 Miyon na belasting (20% di GDP), 350 Miyon na Contribucion social (10% di GDP), mas 195 Miyon na otro entrada (5% di GDP). E otro entradanan ta inclui entre otro dividend di Setar, Web, Elmar, etc. cu ta un tipo di belasting “camufla”.

Durante e mesun periodo, e gastonan di Gobierno (incluyendo gastonan social) tabata riba 1,300 Miyon Florin, esta casi 37% di GDP. Na e nivelnan aki ta birando virtualmente imposibel pa nos comunidad por carga e costo di nos aparato publico.

Ta asina cu Gobierno ta bai cu un porcentahe cada vez mas grandi di locual nos comunidad ta produci. Esaki ta creando un situacion cu dia pa dia ta birando mas dificil pa un comerciante gana placa aki na Aruba. Nos a yega awor na e punto cu e clima di inversion ta birando asina malo na Aruba cu nos economia ta wordo afecta. A yega na un punto cu Gobierno ta rancando basicamente tur placa cu e comunidad aki ta produciendo, y ta gastando e placa aki na formanan cu no ta productivo. Esta, envez di wordo reinverti den nos comunidad, casi tur e placa aki ta bayendo na consumo.

E situacion aki a yega un culminacion cu e introduccion di e medidanan irresponsabel di luna pasa. E medidanan aki, agrega na e problemanan internacional cu nos ta enfrentando (prijs di petroleo, caso Holloway, etc). a pone Aruba den un situacion cu nos ta teme cu ta bai tuma nos hopi aña pa sali afor.

Ademas di esey, nos debilidad financiero ta hasi nos debil politicamente tambe. Hasta por bisa cu ta poniendo na peliger nos status aparte. Nos por a mira con Hulanda a cuminsa pone presion riba Aruba durante e ultimo reunionan tripartite. Esaki a wordo interumpi pa e caida di Gobierno Hulandes. Pero e ta bai bini bek.

Ora cu Hulanda dicidi cu ta necesario pa pone presion riba nos pa nos drecha nos situacion financiero, nos ta bai ta den un posicion extremadamante debil. Un posicion debil cu ta danki na e maneho financiero iresponsabel di nos Gobiernonan. E forma con Gobierno kier drecha esaki (introduccion di medida) ta igual na purba sali for di un pos door di sigui coba.

Locual nos pais mester awor ta hendenan cu kier forma parti di e solucion, nos no mester di mas hende pa empeora e situacion. Esnan cu awe kier purba tira e culpa di nos problemanan financiero den scochi di nos sector priva ta forma parti di problema envez di yuda yega na un solucion.

E mas di 40,000 trahadornan Arubano di sector priva cu ta pagando nan belasting tur aña merece pa Gobierno maneha nan placa na un forma responsabel y cu disciplina. Y no pa cada biaha Gobierno sigui purba ranca mas y mas di e placa pa cual nan ta traha duro tur dia.

Nos tur mester corda semper cu Gobierno ta existi pa un solo meta; pa sirbi nos comunidad. Nan mester hasi esey na e forma mas eficiente y efectivo posibel. Pa Gobierno por logra esey, comunidad ta dispuesto pa contribui un parti razonabel di su entradanan. Ya caba Gobierno ta rancando di mas placa for di comunidad.

Na Aruba a para bira cu Gobierno ta busca forma pa gasta mas y mas placa pa despues inventa manera pa pone comunidad paga pa esaki. Esaki ta sosode cu aprobacion di 11 parlamentario cu ta cobrando miyones di florin simplemente pa hasi manera Gobierno ta instrui nan.

Nos ta keda boga pa responsabilidad fiscal di parti di Gobierno pa asina crea e espacio necesario pa e sector productivo di nos comunidad, esta sector priva, por percura pa un progreso economico na beneficio di henter no comunidad.

ATIA ta e organizacion no-gubernamental mas grandi di Aruba cu mas di 200 miembro cu ta duna trabao na mas di 15,000 mama y tata Arubano. Como tal nos ta boga pa un mihor nivel socio-economico pa tur segmento di nos poblacion.

Pa hanja sa mas di ATIA, of pa bira miembro, bishita www.atiaruba.org.