Serge Mansur

Medida? Awor?

Aruba ta confrontando un serie di reto hopi serio e dianan aki.

Turismo ta bayendo atrás pa basta luna caba. Esaki ta causando, entre otro, cu aerolineanan ta bahando e cantidad di vuelo cu ta bin Aruba. Esaki, na su turno, naturalmente lo hasie mas dificil pa yega Aruba, y lo por afecta nos turisma mas ainda.

Ta dificil pa determina exactamente kico e causanan pa e bahada aki ta, pero nos por deduci cu un factor importante ta e caso di Natalee Holloway. Un caso cu den hopi sentido tabata fuera di nos control y cu su efectonan a wordo empeora door di e interes absurdo cu prensa mericano a pone riba dje.

Locual a hasi esaki pió ta e falta di comunicación di parti di Gobierno y Ministerio Publico ora cu medionan di comunicación di Merca a cuminsa enfoca pipsa riba e caso aki. E falta di comunicación aki ta parce di a empeora e imagen cu pueblo mericano tin di nos isla.

Otro factornan externo, manera prijs di petroleo, tambe a cuminsa afecta nos negativamente. Un ehempel: E barco crusero “Destiny” lo stop di bishita Aruba como cu e gastonan di fuel lo ta demasiado halto. Prijsnan di fuel ta afectando tambe e ticketnan cu pasaheronan ta paga pa yega nos isla.

E situacion aki ta rekeri un plan integral pa nos isla atende cu e situacion aki. Esaki lo nifica inverti fondonan adicional den promocion di nos turismo, pero tambe den e isla mes (seguridad, regulacion di watersports/taxi, limpieza, etc.) pa garantiza un experiencia placentero pa nos bishitantenan.

Otro factor hopi importante den e experiencia di nos bishitantenan ta e prijsnan cu nan ta paga pa nan bishita nos isla. Esakinan pa basta tempo caba ta mas halto cu nos competidornan, pero turistanan tradicionalmente ta(bata) dispuesto pa paga un prijs mas halto pa e experiencia superior cu nan ta(bata) percibi di ricibi aki.

Esaki ta parce di no ta e caso mas.

Locual nos, como pais, mester percura pe ta pa nos convence nos bishitantenan (y potencial bishitantenan) cu e balor cu nan ta ricibi door di bishita nos isla bal e gastonan cu nan lo carga.

Impone medida riba nos pueblo (y alavez riba turista), mientras cu nos isla ta birando mas insegur, mas chaotico y mas sushi cada dia no ta locual nos tin cu hasi. E efectonan riba nos turismo, nos economia, y nos comunidad en general lo ta hopi, pero hopi negativo.

Ya caba nos inflacion ta aumentando mucho rapido, y ya caba e peso financiero riba nos comunidad ta demasiado halto. No ta responsabel pa bini cu mas medida riba nos comunidad na e momentonan aki.

Ta ampliamente conoci cu nos aparato gubernamental ta demasiado grandi. Esaki a wordo treci dilanti na hopi ocasión caba pa nos asociacion, pa IMF, pa World Bank, pa Banco Central, y pa un gran cantidad di otro instancia independiente tanto local como internacional.

Apesar di esaki, atrobe gobierno ta insisti pa laga comunidad paga pa nan decisionnan malo. Ta realmente decepcionante cu aña tras aña nos gobernantenan ta hasiendo e mesun errornan.

Envez di drecha e problema cu ta asina obvio pa tur hende, atrobe ta bini cu medida cu no ta soluciona nos problemanan. ATIA no a mira ningun estudio cu ta indica ki efecto(nan) e medidanan aki lo tin riba nos economia. Tampoco sector comercial no a wordo involucra den un decision cu lo tin efectonan grandi riba nos economia y nos comercio.

Nos ta teme cu e efectonan lo por ta devastador riba nos economia Esaki, hunto cu e prognostico di turismo, lo por tin e efecto cu a lo largo entrada di Gobierno lo por hasta cai. E ora ey lo nos hanja nos mes enfrenta cu un Aparato Gubernamental cu mas problema den un situacion economico debil.

Esaki no por ta beneficioso pa ningun segmento di nos poblacion. E pregunta e ora ey ta bira: Pakico ta tuma decisionnan asina?

Ta unicamente dos contesta tin pa e pregunta ey. Sea e gobierno tin otro prioridad cu pa nan ta pisa mas cu bienestar general, of ta carece di e capacidad necesario pa tuma e decisionnan corecto pa nos pais.

Cualkier un di e dos posibilidadnan ey ta sumamente malo pa Aruba.